കരുനാഗപ്പള്ളി സബ്കോടതിയുടെ വാര്‍ത്താ വിലക്ക് റദ്ദാക്കിയ ഹൈക്കോടതി വിധി പൌരന്‍റെ മൗലിക സ്വാതന്ത്ര്യവും അവകാശവും സംരക്ഷിച്ചുകൊണ്ടുള്ള സമയോചിത നടപടിയാണ്. വാർത്താസമ്മേളനം വിലക്കിയ നടപടി കേട്ടുകേൾവി ഇല്ലാത്തതും.

മുൻപും വാർത്തകൾ പ്രസിദ്ധീകരിക്കുന്നതും ചർച്ച ചെയ്യുന്നതും സംബന്ധിച്ച് കോടതികൾ നിയന്ത്രണങ്ങൾ പ്രഖ്യാപിച്ചിട്ടുണ്ട്. സോളാർ കേസിൽ ഉമ്മൻ ചാണ്ടിക്കെതിരായ ചർച്ചകൾ തടഞ്ഞുകൊണ്ട് കോടതി ഉത്തരവ് അടുത്തിടെയാണ് ഉണ്ടായത്.

എന്നാൽ അത്തരം വിധികളോട് യാതൊരു സാമ്യവുമുള്ളത് ആയിരുന്നില്ല കരുനാഗപ്പള്ളി സബ്കോടതിയുടെ വിധി. തിരുവനന്തപുരം പ്രസ് ക്ലബിനും പതിനെട്ടോളം മാധ്യമങ്ങൾക്കുമെതിരെയായിരുന്നു ഈ നിയന്ത്രണം. കോടതി ഉത്തരവിറങ്ങി മണിക്കൂറുകൾക്കകം തിരുവനന്തപുരം പ്രസ് ക്ലബ്ബ് കെട്ടിടത്തിൽ ഉത്തരവിന്‍റെ കോപ്പി കൊണ്ടുവന്ന് ഒട്ടിച്ചു വെച്ചു.

ചവറ എംഎൽഎ വിജയന്‍ പിള്ളയുടെ മകൻ ശ്രീജിത്ത്ഉൾപ്പെട്ട ഒരു കേസിനെപ്പറ്റി ദുബായ് പൗരൻ വാർത്താസമ്മേളനം നടത്തുന്നത് തടയാൻ വേണ്ടി ആയിരുന്നു അവർ കോടതിയെ സമീപിച്ചത്. ശരീജിത്തുമായി ബന്ധപ്പെട്ട കാര്യങ്ങൾ മാധ്യമങ്ങൾ റിപ്പോർട്ട് ചെയ്യുന്നത് കോടതി വിലക്കുകയും ചെയ്തു. ഇതിനെ ചോദ്യംചെയ്ത് ഹൈക്കോടതിയിൽ സമർപ്പിച്ച ഹർജിയിലാണ് വാർത്താ വിലക്കിന് സ്റ്റേ നൽകിയത്.

വാർത്താ വിലക്ക് സമാനതകളില്ലാത്ത നടപടിയാണ്. ഹൈക്കോടതിയുടെ വിമർശനം ക്ഷണിച്ചു വരുത്തിയ ഈ വിധി കൂടുതൽ ചർച്ച ചെയ്യപ്പെടും. സബ് കോടതി വിധിയെത്തുടർന്ന് വിവാദമായ സാമ്പത്തിക ഇടപാട് കേസ് കൂടുതൽ ജനശ്രദ്ധ ആകർഷിച്ചു എന്നതാണ് വാസ്തവം.

- സ്പെഷ്യൽ കറസ്പോണ്ടന്‍റ് -