2021-22 വര്‍ഷത്തിലെ രണ്ടാം പാദത്തില്‍ ഗൂഗ്​ളിന്റെ മാതൃ കമ്പനിയായ ആല്‍ഫബെറ്റിന്​ വരുമാനത്തില്‍ 40 ശതമാനത്തിലധികം വര്‍ധന. 6190 കോടി യു.എസ്​ ഡോളറാണ്​ രണ്ടാം പാദത്തില്‍ ആല്‍ഫബറ്റിന്റെ വരുമാനം. ഗൂഗ്​ളിന്​ കീഴിലെ യൂട്യൂബ്​ അടക്കമുള്ളവയും വരുമാനത്തില്‍ വന്‍ വര്‍ധനയാണ്​ രേഖപ്പെടുത്തിയത്​.

ജൂലൈ, ആഗസ്റ്റ്​, സെപ്​റ്റംബര്‍ മാസങ്ങളില്‍ യൂട്യൂബിന്റെ വരുമാനം 700 കോടി യു.എസ്​ ഡോളറാണ്​. 2006 നവംബറില്‍ യൂട്യൂബിനെ ഗൂഗ്​ള്‍ ഏറ്റെടുത്തത്​ 165 കോടി യു.എസ്​. ഡോളറിനായിരുന്നു എന്നു കൂടി അറി​യുമ്പോഴാണ്​ വരുമാന വളര്‍ച്ചയുടെ വ്യാപ്​തി ബോധ്യപ്പെടുക. മൊത്തം യൂട്യൂബ്​ കമ്പനിക്ക്​ അന്ന്​ ഗൂഗ്​ള്‍ നല്‍കിയ വില, 15 വര്‍ഷത്തിന്​ ശേഷം, യൂട്യൂബിന്റെ മൂന്നാഴ്ചത്തെ വരുമാന​ത്തേക്കാള്‍ കുറവായിരുന്നു.

2005 ഫെബ്രുവരിയില്‍ ചാഡ് ഹ്യൂര്‍ലി, സ്റ്റീവ് ചിന്‍, ജാവേദ്​ കരീം എന്നിവര്‍ ചേര്‍ന്നായിരുന്നു യൂട്യൂബ്​ എന്ന വിഡിയോ പ്ലാറ്റ്​ഫോം സ്ഥാപിച്ചത്​. ഒരു വര്‍ഷത്തിന്​ ശേഷം, 2006 നവംബറിലാണ്​ യൂട്യൂബിനെ ഗൂഗ്​ള്‍ ഏറ്റെടുക്കുന്നത്​. യൂട്യൂബിന്​ ഗൂഗ്​ള്‍ നല്‍കിയ 165 കോടി ഡോളര്‍ അന്ന്​ വാര്‍ത്തകളില്‍ ഇടം നേടിയിരുന്നു. എന്നാല്‍, 15 വര്‍ഷങ്ങള്‍ക്ക്​ ശേഷം പുതിയ കണക്കുകള്‍ കാണു​മ്പോള്‍ ആ തുക നിസാരമാകുകയാണ്​.

ഇപ്പോള്‍, 100 കോടി മണിക്കൂര്‍ വിഡിയോ ദിവസവും ആളുകള്‍ യൂട്യൂബി​ലൂടെ കാണുന്നുണ്ട്​. അതായത്​, ഊണും ഉറക്കവുമില്ലാതെ 1.14 ലക്ഷം വര്‍ഷം ഒരാള്‍ നിര്‍ത്താതെ വിഡിയോ കാണുന്നത്​ സങ്കല്‍പിച്ചു നോക്കൂ. അതിന്​ തുല്യമായ സമയമുള്ള വിഡിയോയാണ്​ ദിവസവും യൂട്യൂബിലൂടെ മാലോകര്‍ കണ്ടു തീര്‍ക്കുന്നത്​.

യൂട്യൂബിലെ ആദ്യത്തെ വിഡിയോയിലൂടെ 'ഡിസ്​ലൈക്ക്'​ ഒഴിവാക്കാനുള്ള തീരുമാനത്തെ എതിര്‍ത്ത്​ സഹസ്ഥാപകന്‍ യൂട്യൂബില്‍ വിഡിയോകള്‍ക്ക്​ ലഭിക്കുന്ന​ ഡിസ്​ലൈക്കുകളുടെ എണ്ണം പ്രദര്‍ശിപ്പിക്കുന്നത്​ ഒഴിവാക്കാനുള്ള ഗൂഗ്​ളിന്റെ തീരുമാനം ടെക്​ ലോകത്ത്​ ചര്‍ച്ചക്കിടയാക്കിയിരുന്നു. ചിലര്‍ ഇതിനെ അനുകൂലിച്ചപ്പോള്‍ നിരവധിയാളുകള്‍ എതിരഭിപ്രായവുമായുമെത്തി.

ഇപ്പോള്‍ യൂട്യൂബ്​ സഹസ്ഥാപകനായ ജാവേദ്​ കരീമും അതിനെതിരെ രംഗത്തെത്തിയിരിക്കുകയാണ്​. വ്യത്യസ്തമായ രീതിയിലായിരുന്നു അദ്ദേഹം തന്റെ അഭിപ്രായം രേഖപ്പെടുത്തിയത്​. യൂട്യൂബില്‍ അപ്​ലോഡ്​ ചെയ്യപ്പെട്ട ഏറ്റവും ആദ്യത്തെ വിഡിയോയുടെ 'ഡിസ്​ക്രിപ്​ഷന്‍' ​സെക്ഷന്‍ എഡിറ്റ്​ ചെയ്​തുകൊണ്ടാണ്​ അദ്ദേഹം അധികൃതരുടെ തീരുമാനത്തെ എതിര്‍ത്തത്​.

ചാഡ് ഹ്യൂര്‍ലി, സ്റ്റീവ് ചിന്‍, ജാവേദ്​ കരീം എന്നിവര്‍ ചേര്‍ന്നായിരുന്നു യൂട്യൂബ്​ എന്ന വിഡിയോ പ്ലാറ്റ്​ഫോം സ്ഥാപിച്ചത്​. ഗൂഗ്​ളിന്​ വില്‍ക്കുന്നതിന്​ മുമ്പായി യൂട്യൂബില്‍ ആദ്യമായി വിഡിയോ അപ്​ലോഡ്​ ചെയ്​തത്​ ജാവേദ്​ കരീമായിരുന്നു. 'മീ അറ്റ്​ ദ സൂ' എന്ന 18 സെക്കന്‍റുകള്‍ മാത്രമുള്ള വിഡിയോയില്‍ ഒരു മൃഗശാലയിലെ ആനയെ കുറിച്ചാണ്​ അദ്ദേഹം സംസാരിക്കുന്നത്​.

"ഡിസ്‌ലൈക്കുകള്‍ നീക്കം ചെയ്യുന്നത് ഒരു മണ്ടന്‍ ആശയമാണെന്ന് ഓരോ യൂട്യൂബറും സമ്മതിക്കുമ്പോള്‍, അത് തന്നെയാണ്​ ശരി. വീണ്ടും ശ്രമിക്കുക, യൂട്യൂബ്​," അദ്ദേഹം വിഡിയോയുടെ ഡിസ്​ക്രിപ്​ഷന്‍ ബോക്സില്‍ എഴുതി. 'ഡിസ്​ലൈക്കുകളില്‍ കൊണ്ടുവരുന്ന മാറ്റത്തിന്​ പിന്നില്‍ കാരണമുണ്ടായിരിക്കാം, എന്നാല്‍, അത്​ നല്ലതല്ല. അതിനുള്ള കാരണം അവര്‍ പരസ്യമാക്കുകയില്ല. എന്നാല്‍, തങ്ങളുടെ നീക്കത്തെ ന്യായീകരിക്കാന്‍ പല പഠനങ്ങളും അവര്‍ ചൂണ്ടിക്കാട്ടിയേക്കും. അതെല്ലാം ഒരു യൂട്യൂബറുടെ സാമാന്യ ബോധത്തെ വെല്ലുവിളിക്കുന്നതാണ്​. ആളുകള്‍ക്ക്​ അവരുടെ താല്‍പര്യങ്ങള്‍ പ്രകടിപ്പിക്കാനുള്ള വഴിയാണ്​ ഡിസ്​ലൈക്ക്​ ഓപ്​ഷനെന്നും അദ്ദേഹം കൂട്ടിച്ചേര്‍ത്തു.

2005 ഏപ്രില്‍ 24ന്​ യൂട്യൂബില്‍ അപ്​ലോഡ്​ ചെയ്യപ്പെട്ട ജാവേദ്​ കരീമിയുടെ വിഡിയോക്ക്​ നിലവില്‍ രണ്ട്​ കോടിയിലധികം കാഴ്​ച്ചക്കാരുണ്ട്​. 10 മില്യണ്‍ ലൈക്കുകള്‍ ലഭിച്ച വിഡിയോക്ക്​ 2.25 ലക്ഷത്തോളം ഡിസ്​ലൈക്കുകളും ലഭിച്ചിട്ടുണ്ട്​.

അതേസമയം, യൂട്യൂബിന്റെ പുതിയ രീതി പ്രകാരം വീഡിയോ അപ്​ലോഡ് ചെയ്യുന്നവര്‍ക്കു മാത്രമേ ഡിസ്​ലൈക്കുകള്‍ കാണാനാകു. അതേസമയം, ഡിസ്​ലൈക്ക് ബട്ടണ്‍ സൗകര്യം കമ്പനി ഒഴിവാക്കില്ല. കാഴ്ചക്കാര്‍ക്ക് ഉപയോഗിക്കാനുള്ള സൗകര്യവും നിലനിര്‍ത്തും.

എന്നാല്‍, വീഡിയോക്ക് ലഭിക്കുന്ന ഡിസ്​ലൈക്കുകളുടെ എണ്ണം കാഴ്ചക്കാര്‍ക്ക് കാണാനാകില്ല. വീഡിയോ അപ്​ലോഡ് ചെയ്യുന്നവര്‍ക്കു മാത്രമായി ചുരുക്കും. ഡിസ്​ലൈക്ക് സൗകര്യം ദുരുപയോഗം ചെയ്യുന്നത് വ്യാപകമായതോടെയാണ് ഉപഭോക്താക്കളുടെ താല്‍പര്യം സംരക്ഷിക്കുന്നതിന്റെ ഭാഗമായി പുതിയ തീരുമാനം. വ്യക്തിപരമായ പ്രതികാരം തീര്‍ക്കുന്നതിന് യൂട്യൂബ് ദുരുപയോഗം ചെയ്യുന്നതായി പരാതി ഉയര്‍ന്നിരുന്നു.