Filmi Beat
- News Desk
- 17-11-2021
- Font Size
തിരുവനന്തപുരം: സംസ്ഥാന സര്‍ക്കാരിന്റെ സ്വന്തം OTT പ്ലാറ്റ്ഫോം 'ചിത്രാഞ്ജലി' മാര്‍ച്ചില്‍ നിലവില്‍വരും. പ്രൊഡ്യൂസര്‍മാര്‍ക്ക് സാമ്പത്തികപരമായി കൈത്താങ്ങേകുക എന്നതാണ് ഒ ടി ടി പ്ലാറ്റ്ഫോമിലൂടെ ലക്ഷ്യംവയ്ക്കുന്നതെന്ന് ചലച്ചിത്ര വികസന കോര്‍പ്പറേഷന്‍ എം ഡി എന്‍ മായ പറഞ്ഞു. കലാമൂല്യം ഉണ്ടെങ്കിലും തീയറ്ററുകളില്‍ ഇടം ലഭിക്കാതെ പോകുന്ന നിരവധി ചിത്രങ്ങള്‍ മലയാള സിനിമയിലുണ്ട്. അതിനാല്‍ തീയറ്ററുകളില്‍ ഇടം കിട്ടാത്ത കലാമൂല്യമുള്ള ചിത്രങ്ങള്‍ക്കാകും സര്‍ക്കാര്‍ ഒ ടി ടി യില്‍ കൂടുതല്‍ പരിഗണന ലഭിക്കുക. തീയറ്ററുകളില്‍ പ്രദര്‍ശിപ്പിച്ച ചിത്രങ്ങളുമുണ്ടാകും.
തീയറ്ററുകളിലെ പ്രദര്‍ശന കാലാവധിക്കുശേഷം ഈ ചിത്രങ്ങള്‍ സര്‍ക്കാര്‍ ഒ ടി ടിയിലേക്ക് എത്തും. നെറ്റ്ഫ്ലിക്സ്, ആമസോണ്‍ അടക്കമുള്ള ഒ ടി ടി പ്ലാറ്റഫോമുകളേക്കാള്‍ കുറഞ്ഞനിരക്കില്‍ സിനിമകള്‍ പ്രേക്ഷകരിലെത്തിക്കുമെന്നും ചലച്ചിത്ര വികസന കോര്‍പ്പറേഷന്‍ എം ഡി വ്യക്തമാക്കി.
കരാറിന് ഏഴ് കമ്പനികളാണ് രംഗത്തുള്ളത്. ഇതില്‍ ഒരു കമ്പനിയെ അടുത്തമാസം തെരഞ്ഞെടുക്കും. കമ്പനിയെ തെരഞ്ഞെടുത്ത ശേഷം മൂന്ന് മാസംകൊണ്ട് ഒ ടി ടി പ്ലാറ്റ്ഫോം യാഥാര്‍ത്ഥ്യമാക്കാനാണ് ചലച്ചിത്ര വികസന കോര്‍പ്പറേഷന്റെ തീരുമാനം. രണ്ടു വര്‍ഷത്തേക്ക് ഒ ടി ടി പ്ലാറ്റ്ഫോം വാടകയ്ക്ക് എടുക്കും. അടുത്ത അഞ്ചു വര്‍ഷത്തേക്ക് ആറ് കോടിയാണ് പ്രതീക്ഷിക്കുന്ന ചെലവ്. വാടക ഇനത്തില്‍ അടക്കമുള്ള ചെലവാണിത്.
കോവിഡ് നിയന്ത്രണങ്ങളെ തുടര്‍ന്ന് തീയറ്ററുകള്‍ അടഞ്ഞു കിടന്നിരുന്ന സമയത്താണ് സ്വന്തമായി ഒടിടി പ്ലാറ്റ്ഫോം എന്ന ആശയം ചലച്ചിത്ര വികസന കോര്‍പ്പറേഷന്‍ മുന്നോട്ടുവച്ചത്‌. ഈ ആശയത്തിന് സര്‍ക്കാരിന്റെ അംഗീകാരം കൂടി ലഭിച്ചതോടെ തുടര്‍ നടപടികള്‍ വേഗത്തിലായി.
സര്‍ക്കാര്‍ സ്വന്തമായി ഒ ടി ടി പ്ലാറ്റ്ഫോം പുറത്തിറക്കുന്നു എന്ന വിവരങ്ങള്‍ പുറത്തുവന്നതിനു പിന്നാലെ ആശങ്ക പ്രകടിപ്പിച്ച്‌ തീയറ്റര്‍ ഉടമകള്‍ രംഗത്തെത്തിയിരുന്നു. സര്‍ക്കാരിന്റെ ഒ ടി ടി പ്ലാറ്റ്ഫോം സിനിമാ തീയറ്ററുകളുടെ വരുമാനത്തെ ബാധിക്കുമോ എന്ന ആശങ്കയാണ് തീയറ്റര്‍ ഉടമകള്‍ മുന്നോട്ടുവച്ചിരുന്നത്‌. എന്നാല്‍ സര്‍ക്കാര്‍ ഒ ടി ടി പ്ലാറ്റ്ഫോമിന്റെ കാര്യത്തില്‍ തീയറ്റര്‍ ഉടമകള്‍ക്ക് ആശങ്ക വേണ്ടന്ന് ചലച്ചിത്ര വികസന കോര്‍പ്പറേഷന്‍ വ്യക്തമാക്കി.
സാമ്പത്തിക ലാഭം ഉദ്ദേശിച്ചല്ല സര്‍ക്കാര്‍ ഒ ടി ടി പ്ലാറ്റ്ഫോം പുറത്തിറക്കുന്നതെന്നും കോര്‍പ്പറേഷന്‍ കൂട്ടിച്ചേര്‍ത്തു. മലയാള സിനിമയിലെ കൂടുതല്‍ ചിത്രങ്ങള്‍ ഒ ടി ടി പ്ലാറ്റ്ഫോമിലേക്ക് പോകുന്നത്‌ സംബന്ധിച്ച ചര്‍ച്ചകളും വിവാദങ്ങളും നിലനില്‍ക്കെയാണ് സംസ്ഥാന സര്‍ക്കാര്‍ സ്വന്തം ഒ ടി ടി പ്ലാറ്റ്ഫോമുമായി രംഗത്തെത്തുന്നത്.
Comments
ഇവിടെ പോസ്റ്റു ചെയ്യുന്ന അഭിപ്രായങ്ങൾ ന്യൂസ് അറ്റ്‌ ഫസ്റ്റിന്‍റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്‍റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
മലയാളത്തിൽ ഇവിടെ ടൈപ്പ് ചെയ്യാം.
(ctrl+g to swap language)