ദുബയ്: വംശീയതയ്‌ക്കെതിരേ ടീമിനൊപ്പം നിലകൊള്ളാത്തതിനെ തുടര്‍ന്ന് ദക്ഷിണാഫ്രിക്കന്‍ ടീമില്‍ നിന്നും പുറത്തായ മുന്‍ ക്യാപ്റ്റന്‍ ഡീകോക്ക് ക്ഷമാപണവുമായി രംഗത്ത്. താന്‍ വംശീയവാദിയല്ലെന്നും തന്നെ അങ്ങിനെ വിളിക്കരുതെന്നും താരം ആവശ്യപ്പെട്ടു.

'വര്‍ണവിവേചനത്തിനും വംശീയതയ്ക്കും താന്‍ എതിരല്ല. ടീമിനൊപ്പം ലോകകപ്പില്‍ മുട്ടുകുത്തി പ്രതിഷേധിക്കാന്‍ താന്‍ ഒരുക്കമാണ്. ഈ വിഷയത്തിന്റെ പ്രാധാന്യം ഉള്‍കൊള്ളാതെയാണ് നിലപാട് എടുത്തത്. വംശീയതയ്‌ക്കെതിരായി താന്‍ പ്രതിഷേധിക്കുന്നതിലൂടെ മറ്റുള്ളവരുടെ ജീവിതം മെച്ചപ്പെടുന്നുണ്ടെങ്കില്‍ താന്‍ സന്തോഷവാനാണ്. തന്റെ പ്രവൃത്തിയില്‍ ക്ഷമാപണം നടത്തുന്നു. കറുത്തവരും വെളുത്തവരും അടങ്ങിയതാണ് തന്റെ കുടുംബം എല്ലാവരെയും ഒരുപോലെ കാണാനാണിഷ്ടം. ദക്ഷിണാഫ്രിക്കന്‍ ടീമിനായി തനിക്ക് ഇനിയും കളിക്കണം'- താരം പറഞ്ഞു.

കഴിഞ്ഞ ദിവസം ലോകകപ്പിലെ വിന്‍ഡീസിനെതിരായ മല്‍സരത്തിന് തൊട്ടുമുമ്പാണ് ഡീകോക്ക് ടീമില്‍ നിന്നും പുറത്തായത്.