ന്യൂഡല്‍ഹി: മുഖ്യ പലിശ നിരക്കുകളില്‍ മാറ്റം വരുത്താതെ റിസര്‍വ് ബാങ്ക് ഓഫ് ഇന്ത്യ പുതിയ വായ്പ നയം പ്രഖ്യാപിച്ചു. ബാങ്കുകള്‍ക്ക് റിസര്‍വ് ബാങ്ക് നല്‍കുന്ന വായ്പകള്‍ക്കുള്ള പലിശനിരക്കായ റിപ്പോ നാലുശതമാനമായി തുടരും. റിസര്‍വ് ബാങ്കിലുള്ള നിക്ഷേപങ്ങള്‍ക്ക് നല്‍കുന്ന പലിശയായ റിവേഴ്‌സ് റിപ്പോ നിരക്ക് 3.35 ശതമാനമായി തുടരുമെന്നും റിസര്‍വ് ബാങ്ക് അറിയിച്ചു.

തുടര്‍ച്ചയായ എട്ടാംതവണയാണ്​ നിരക്കുകളില്‍ മാറ്റമില്ലാതെ തുടരുന്നത്​. വാണിജ്യബാങ്കുകള്‍ റിസര്‍വ്​ ബാങ്കില്‍നിന്ന്​ എടുക്കുന്ന വായ്​പക്ക്​ ചുമത്തുന്ന പലിശ നിരക്കാണ്​ റിപ്പോ​. വാണിജ്യബാങ്കുകളുടെ കരുതല്‍ പണത്തിന്​ റിസര്‍വ്​ നല്‍കുന്ന പലിശയാണ്​ റിവേ​ഴ്​സ്​ റിപ്പോ.

രാജ്യത്ത് പണപ്പെരുപ്പ നിരക്ക് ഉയരുന്ന പശ്ചാത്തലത്തിലാണ് മുഖ്യപ്പലിശനിരക്കുകളില്‍ മാറ്റം വരുത്തേണ്ടതില്ല എന്ന് റിസര്‍വ് ബാങ്ക് തീരുമാനിച്ചത്. പെട്രോളിയം ഉല്‍പ്പന്നങ്ങളുടെ വില കൂടുന്നതും സവാളയുടെ വില ഉയരുന്നതും റിസര്‍വ് ബാങ്ക് നിരീക്ഷിച്ചുവരികയാണ്. മൂന്നുദിവസത്തെ വായ്​പ അവലോകന യോഗത്തിന്​ ശേഷമാണ്​ ശക്തികാന്തദാസിന്റെ വായ്​പനയ പ്രഖ്യാപനം.

രാജ്യത്തിന്റെ സാമ്പത്തികവളര്‍ച്ച ത്വരിതപ്പെടുത്തുന്ന പ്രവര്‍ത്തനങ്ങളുമായി മുന്നോട്ടു പോകുമെന്നും റിസര്‍വ് ബാങ്ക് അറിയിച്ചു.