ഐ.ഐ.ടികളില്‍ എന്‍ജിനീയറിങ്​, ആര്‍ക്കിടെക്​ചര്‍, സയന്‍സ്​ അണ്ടര്‍ ഗ്രാജ്വേറ്റ്​ പ്രോഗ്രാമുകളിലേക്കുള്ള ജോയന്‍റ്​ എന്‍ട്രന്‍സ്​ എക്​സാമിനേഷന്‍ (ജെ.ഇ.ഇ) അഡ്വാന്‍സ്​ഡ്​ ഒക്​ടോബര്‍ മൂന്നിന്​ ദേശീയതലത്തില്‍ നടത്തും. 'ജെ.ഇ.ഇ മെയിന്‍ 2021'ല്‍ ഉയര്‍ന്ന സ്​കോര്‍ നേടിയ രണ്ടര ലക്ഷം പേര്‍ക്ക്​ ​'ജെ.ഇ.ഇ അഡ്വാന്‍സ്​ഡ്​ 2021'ല്‍ പ​ങ്കെടുക്കാം. വിജ്​ഞാപനവും വിശദവിവരങ്ങളടങ്ങിയ ഇന്‍ഫര്‍മേഷന്‍ ബ്രോഷറും https://jeeadv.ac.in ല്‍ ലഭ്യമാണ്​.

രജിസ്​ട്രേഷന്‍ ഫീസ്​ 2800 രൂപ. എസ്​.സി/ എസ്​.ടി/ പി.ഡബ്ല്യു.ഡി/ വനിതകള്‍ എന്നീ വിഭാഗങ്ങളില്‍ പെടുന്നവര്‍ക്ക്​ 1400 രൂപ മതി. ഓണ്‍ലൈന്‍ രജിസ്​ട്രേഷന്‍/ അപേക്ഷ സെപ്​റ്റംബര്‍ 11 രാവിലെ 10 മുതല്‍ 16ന്​ വൈകീട്ട്​ അഞ്ചുവരെ സമര്‍പ്പിക്കാം. ഇതിനുള്ള മാര്‍ഗനിര്‍ദേശങ്ങള്‍ ഇന്‍ഫര്‍മേഷന്‍ ബ്രോഷറിലുണ്ട്​. ഫീസ്​ സെപ്​റ്റംബര്‍ 17 വൈകീട്ട്​ അഞ്ചുവരെ ഓണ്‍ലൈനായി അടക്കാം.

കമ്പ്യൂട്ടര്‍ അധിഷ്​ഠിത പരീക്ഷയില്‍ രണ്ടു പേപ്പറുകളുണ്ട്​​. ഒക്​ടോബര്‍ മൂന്നിന്​ രാവിലെ ഒമ്പതു മുതല്‍ 12 വരെ പേപ്പര്‍ ഒന്നും ഉച്ചക്കുശേഷം 2.30 മുതല്‍ 5.30 വരെ പേപ്പര്‍ രണ്ടും നടത്തും. പരീക്ഷ ഘടനയും സിലബസും വെബ്​സൈറ്റിലുണ്ട്​.

ജെ.ഇ.ഇ ​അഡ്വാന്‍സ്​ഡ്​ റാങ്ക്​ അടിസ്​ഥനത്തില്‍ വിവിധ ഐ.ഐ.ടികളിലായി നാലുവര്‍ഷത്തെ ബി.ടെക്​, ബി.എസ്​, അഞ്ചു വര്‍ഷത്തെ ഡ്യൂവല്‍ ഡിഗ്രി ബി.ടെക്​-എം.ടെക്​, ഡ്യുവല്‍ ഡിഗ്രി ബി.എസ്​-എം.എസ്​, ഇന്‍റഗ്രേറ്റഡ്​ എം.ടെക്​/ എം.എസ്​സി പ്രോ​ഗ്രാമുകളില്‍ പ്രവേശനത്തിന്​ അര്‍ഹതയുണ്ട്​. ഐ.ഐ.ടികള്‍ പാലക്കാട്​, ചെന്നൈ, ഹൈദരാബാദ്​, ഗോവ, തിരുപ്പതി, ധര്‍വാര്‍ഡ്​, മുംബൈ, ന്യൂഡല്‍ഹി, ഖരഗ്​പുര്‍, ഭുവനേശ്വര്‍, ഭിലായ്​, കാന്‍പൂര്‍, വാരാണസി, ഇന്ദോര്‍, ജമ്മു, ജോധ്​പൂര്‍, ഗുവാഹതി, പട്​ന, റൂര്‍ക്കി, മാണ്ഡി, റോപാര്‍, ഗാന്ധിനഗര്‍ എന്നിവിടങ്ങളിലാണുള്ളത്​.

വാരാണസി, ഖരഗ്​പുര്‍, റൂര്‍ക്കി ഐ.ഐ.ടികള്‍ നടത്തുന്ന ബി.ആര്‍ക്​ പ്രവേശനത്തിന്​ ഒക്​ടോബര്‍ 18ന്​ രാവിലെ ഒമ്ബതു മുതല്‍ ഉച്ചക്ക്​ 12 വരെ സംഘടിപ്പിക്കുന്ന ആര്‍ക്കിടെക്​ചര്‍ അഭിരുചി പരീക്ഷയില്‍ (AAT) യോഗ്യത നേടണം.

ഈ ടെസ്​റ്റില്‍ പ​ങ്കെടുക്കുന്നതിനുള്ള രജിസ്​​ട്രേഷന്‍ ഒക്​ടോബര്‍ 15, 16 തീയതികളില്‍ നടത്താം. കൂടുതല്‍ വിവരങ്ങള്‍ക്ക്​ https://jeeadv.ac.in ​.