
ആലപ്പുഴ: കഴിഞ്ഞ ദിവസം ആറ്റിങ്ങലില് ബി.ജെ.പി. പ്രവര്ത്തകര് മരംമുറി സംഭവത്തില് നടത്തിയ പ്രതിഷേധത്തിനിടെ പെട്രോള് വിലവര്ധനവിനെതിരായ പ്ലക്കാര്ഡ് ഉയര്ന്നതില് പ്രതികരണവുമായി മുന് മന്ത്രി തോമസ് ഐസക്. 'പെട്രോള് വില സെഞ്ച്വറിയടച്ചു, പ്രതിഷേധിക്കുക' എന്ന പ്ലക്കാര്ഡ് ഉയര്ത്തിയ കുട്ടിയെ ട്രോളുന്നതില് അര്ത്ഥമില്ല; ബി.ജെ.പിക്കാരുടെ ഉള്ളിലെ പ്രതിഷേധമാണ് ഉയര്ത്തിയതെന്ന് ഐസക് പറഞ്ഞു ഫേസ്ബുക്കിലൂടെയായിരുന്നു അദ്ദേഹത്തിന്റെ പ്രതികരണം.
ഫേസ്ബുക്ക് പോസ്റ്റിന്റെ പൂര്ണ്ണരൂപം...
വിലക്കയറ്റത്തെക്കുറിച്ചുള്ള കഴിഞ്ഞ പോസ്റ്റിനുശേഷം ഇതും കിടക്കട്ടെ...
ആറ്റിങ്ങലില് ബിജെപിയുടെ ഒരു പ്രതിഷേധ പരിപാടിയില് ഡിവൈഎഫ്ഐയുടെ പ്ലക്കാര്ഡ് പ്രത്യക്ഷപ്പെട്ടത് ഒരു അബദ്ധമായി ഞാന് കാണുന്നില്ല. നാം അതിനെ മറ്റൊരു തരത്തിലാണ് കാണേണ്ടത്. ഡിവൈഎഫ്ഐയുടെ ഒരു പ്ലക്കാര്ഡ് ബിജെപി പ്രവര്ത്തകര് ഉയര്ത്തിപ്പിടിക്കില്ല എന്നത് നൂറു തരം.
പക്ഷേ, ഇവിടെ പെട്രോള് വില വര്ദ്ധനയ്ക്കെതിരെയാണ് പ്ലക്കാര്ഡ്. ഈ പ്ലക്കാര്ഡ് പിടിച്ച പെണ്കുട്ടി മുദ്രാവാക്യം മാത്രമേ വായിച്ചിട്ടുണ്ടാകൂ എന്നാണ് ഞാന് മനസിലാക്കുന്നത്. പെട്രോള് വില ഇങ്ങനെ കുതിച്ചുയരുന്നതില് ആ പ്രവര്ത്തകയുടെ ഉള്ളിലും പ്രതിഷേധമുണ്ട്. ബിജെപി സംഘടിപ്പിക്കുന്ന സമരം അതിനെതിരെ ആയിരിക്കും എന്ന് കരുതിയിട്ടുണ്ടാകും.
ആ കുട്ടിയെ ട്രോളുന്നതില് അര്ത്ഥമില്ല. പെട്രോള് വില വര്ദ്ധനയ്ക്കെതിരെ ആ കുട്ടിയുടെ ഉള്ളിലും പ്രതിഷേധമുണ്ട്. രാജ്യത്താകമാനം ബിജെപി പ്രവര്ത്തകര് തങ്ങളുടെ ഉള്ളില് അടക്കിപ്പിടിക്കുന്ന ആ പ്രതിഷേധമാണ്, അബദ്ധത്തിലെങ്കിലും അവര് ഉയര്ത്തിപ്പിടിച്ചത്.
ഇത് അല്ലെങ്കില് എങ്ങനെ ഇത് സംഭവിച്ചു? മറിച്ചൊരു വിശദീകരണം തരാന് ആര്ക്കെങ്കിലും കഴിയുമോ?
Comments
ഇവിടെ പോസ്റ്റു ചെയ്യുന്ന അഭിപ്രായങ്ങൾ ന്യൂസ് അറ്റ് ഫസ്റ്റിന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
മലയാളത്തിൽ ഇവിടെ ടൈപ്പ് ചെയ്യാം.
(ctrl+g to swap language)