ബംഗളൂരു: വിജയ്​ ഹസാരെ ട്രോഫി എലൈറ്റ്​ ഗ്രൂപ്പ്​ സി മത്സരത്തില്‍ റെയില്‍വേസിനെതിരെ കേരളത്തിന്​ ജയം. ആവേശം അവസാന ഓവര്‍ വരെ നീണ്ടുനിന്ന മത്സരത്തില്‍ ഏഴ് റണ്‍സിനായിരുന്നു കേരളത്തിന്‍റെ വിജയം. ആദ്യം ബാറ്റുചെയ്​ത കേരളം റോബിന്‍ ഉത്തപ്പയുടെയും (100) വിഷ്​ണു വിനോദിന്‍റെയും (107) തകര്‍പ്പന്‍ സെഞ്ച്വറികളുടെ മികവില്‍ 50 ഓവറില്‍ ആറുവിക്കറ്റിന്​ 351 റണ്‍സെടുത്തു.

മറുപടി ബാറ്റിങ്ങിനിറങ്ങിയ റെയില്‍വേസ്​ രണ്ടുപന്ത്​ ബാക്കി നില്‍ക്കേ 344 റണ്‍സിന്​ പുറത്തായി. മൃണാല്‍ ദേവ്​ധര്‍ (79), അരിന്ദം ഘോഷ്​ (64), സൗരഭ്​ സിങ്​ (50), ഹര്‍ഷ്​ ത്യാഗി (58) എന്നിവര്‍ റെയില്‍വേയ്ക്കായി പൊരുതിനോക്കി.

കേരളത്തിനായി നിതീഷ്​ എം.ഡി മൂന്ന്​ വിക്കറ്റ്​ വീഴ്​ത്തി. ശ്രീശാന്ത്​, എന്‍. ബാസില്‍, സചിന്‍ ബേബി എന്നിവര്‍ രണ്ടു വിക്കറ്റ്​ വീഴ്​ത്തി.

തകര്‍പ്പന്‍ ഫോമില്‍ തുടരുന്ന​ റോബിന്‍ ഉത്തപ്പയുടേയും വിഷ്​ണുവിനോദിന്‍റെയും സെഞ്ച്വറികളാണ്​ കേരളത്തിന്‍റെ ഇന്നിങ്​സിന്​ ഇന്ധനമായത്​. പിന്നാലെ ബാറ്റിങ്ങിനിറങ്ങിയ സഞ്​ജു സാംസണ്‍ അതിവേഗത്തില്‍ അര്‍ധ സെഞ്ച്വറി കൂടി കുറിച്ചതോടെ കേരളത്തിന്‍റെ സ്​കോര്‍ കുതിച്ചുപാഞ്ഞു. എന്നാല്‍ തുടര്‍ന്നെത്തിയ സചിന്‍ ബേബി (1), മുഹമ്മദ്​ അസ്​ഹറുദ്ദീന്‍ (5) എന്നിവര്‍ക്ക്​ തിളങ്ങാനാകാത്തതിനാല്‍​ കേരള സ്​കോറിങ്​ അല്‍പ്പം തണുത്തു. വാലറ്റത്ത്​ പൊരുതിയ വത്​സലാണ്​ (46) കേരള സ്​കോര്‍ 350 കടത്തിയത്​.

104 പന്തുകളില്‍ നിന്നും എട്ടു ബൗണ്ടറികളും അഞ്ചുസിക്​സറുകളുമടക്കമാണ്​ ഉത്തപ്പ സെഞ്ച്വറി കുറിച്ചത്​. ഇതോടെ വിജയ്​ ഹസാരെ ​േട്രാഫിയില്‍ ഏറ്റവും കൂടുതല്‍ സെഞ്ച്വറി നേടുന്ന താരമായി ഉത്തപ്പ മാറി.

11 സെഞ്ച്വറികള്‍ നേടിയ ഉത്തപ്പ യഷ്​പാല്‍ സിങ്ങിന്‍റെ പത്ത്​ സെഞ്ച്വറികളെന്ന റെക്കോര്‍ഡാണ്​ പഴങ്കഥയാക്കിയത്​. അഞ്ചുബൗണ്ടറികളും നാലുസിക്​സറുകളുമടക്കം 107 പന്തില്‍ 107 റണ്‍സുമായി വിഷ്​ണുവിനോദ്​ മറുഭാഗത്തും ആഘോഷപൂര്‍വ്വം ബാറ്റുവീശി.

ഉത്തപ്പയ്ക്ക്​ ശേഷം ക്രീസിലെത്തിയ സഞ്​ജു തുടക്കം മുതല്‍ ആക്രമിച്ചാണ്​ കളിച്ചത്​. വെറും 25 പന്തിലാണ്​ സഞ്​ജു അര്‍ധ ശതകം പൂര്‍ത്തിയാക്കിയത്​. 29 പന്തില്‍ 61 റണ്‍സെടുത്ത സഞ്​ജു റെയില്‍വേ ബൗളര്‍മാരെ തലങ്ങും വിലങ്ങും തല്ലി ഓടിക്കുകയായിരുന്നു. ഏഴാം തവണയാണ്​ കേരളം ലിസ്റ്റ്​ എ മത്സരത്തില്‍ 300ന്​ മുകളില്‍ സ്​കോര്‍ ചെയ്യുന്നത്​. ലിസ്റ്റ്​ എ മത്സരങ്ങളിലെ കേരളത്തിന്‍റെ ഏറ്റവും ഉയര്‍ന്ന സ്​കോറാണിത്​.