തിരുവനന്തപുരം: മെഡിക്കൽ കോളേജ്, ആർസിസി, ശ്രീചിത്ര, എസ്എടി തുടങ്ങിയ ആശുപത്രികളിൽ എത്തുന്നവർക്ക് അതിരാവിലെ തന്നെ നേരിട്ടെത്താൻ തിരുവനന്തപുരം ജില്ലയുടെ വിവിധ ഭാഗങ്ങളിൽ നിന്നും സമീപ ജില്ലകളിൽ നിന്നും നേരിട്ട് മെഡിക്കൽ കോളേജിലേക്കും തലസ്ഥാനത്തെ വിവിധ പ്രധാനപ്പെട്ട ആശുപത്രികളിലേക്കും ജനുവരി 27 മുതൽ രാവിലേയും വൈകുന്നേരവും കെ.എസ്.ആർ.ടി.സി സർവ്വീസ് ആരംഭിക്കുന്നു.

തിരുവനന്തപുരം നഗരത്തിനുള്ളിലെ സർക്കാർ, സ്വകാര്യ ആശുപത്രികൾ കേന്ദ്രീകരിച്ചാണ് കെ.എസ്.ആർ.ടി.സി പുതിയ സർവ്വീസുകൾ ആരംഭിക്കുന്നത്. ആശുപത്രി ജീവനക്കാരുടെയും പൊതുജനങ്ങളുടെയും ഇടയിൽ സർവ്വേ നടത്തിയതിന്റെ അടിസ്ഥാനത്തിലാണ് പുതിയ സർവ്വീസുകൾ ആരംഭിക്കുക. 

വിവിധ സർക്കാർ സ്വകാര്യ ആശുപത്രികളിലെ ജീവനക്കാർക്കും മറ്റ് പൊതുജനങ്ങൾക്കും എത്തിച്ചേരുന്നതിന് സൗകര്യപ്രദമായ സമയത്തും റൂട്ടുകളിലുമാണ് സർവ്വീസുകൾ ക്രമീകരിച്ചിരിക്കുന്നത്. പാറശ്ശാല, നെയ്യാറ്റിൻകര, കാട്ടാക്കട, നെടുമങ്ങാട്, വിതുര, കുളത്തൂപ്പുഴ, ആര്യങ്കാവ്, വെള്ളനാട്, വെള്ളറട, പൂവാർ, വിഴിഞ്ഞം, വെഞ്ഞാറമൂട്, ആറ്റിങ്ങൽ, കണിയാപുരം, പാലോട് എന്നിവിടങ്ങളിൽ നിന്ന് രാവിലെ 6 മണിക്ക് ഒ.പിയിൽ എത്തിച്ചേരുന്ന വിധത്തിലാണ് സർവ്വീസുകൾ ക്രമീകരിക്കുക.

ഒ.പി യിലെ പരിശോധനയ്ക്ക് ശേഷം തിരികെ പോകുന്നതിനായി രാവിലെ 11.00 മണി മുതൽ ഉച്ചയ്ക്ക് ശേഷം 3 മണി വരെ പതിനഞ്ച് മിനിറ്റ് ഇടവേളകളിൽ തിരുവനന്തപുരം സെൻട്രൽ ഡിപ്പോയിൽ നിന്നും പാറശ്ശാല, നെയ്യാറ്റിൻകര, കാട്ടാക്കട, നെടുമങ്ങാട് എന്നീ പ്രദേശങ്ങളിലേക്ക് തിരികെ സർവ്വീസുകൾ ഉണ്ടായിരിക്കും. ഈസ്റ്റ്‌ ഫോർട്ടിൽ നിന്ന് തമ്പാനൂർ ബസ് ടെർമിനനിൽ കണക്ട് ചെയ്ത് മെഡിക്കൽ കോളേജിലേക്ക് കെ എസ് ആർ ടി സി സർവീസ് നടത്തും

രാവിലെ 07:00 മണി വരെ ഉള്ള സർവ്വീസുകൾ മെഡിക്കൽ കോളേജ് ക്യാമ്പസിനുള്ളിൽ വരെ സർവ്വീസ് നടത്തും. മെഡിക്കൽ കോളേജ് ഒ.പി കൗണ്ടറിൽ സർവ്വീസുകൾ സംബന്ധിച്ച സമയ വിവരപ്പട്ടിക സ്ഥാപിക്കുകയും ചെയ്യും. ഈ സർവ്വീസുകളിൽ ഹോസ്പിറ്റൽ സർവ്വീസ് എന്ന പ്രത്യേക ബോർഡും ഉണ്ടായിരിക്കുന്നതാണ്. ജനുവരി 27 മുതൽ വിവിധ ഡിപ്പോകളിൽ നിന്നും 21 പുതിയ റൂട്ടുകളിൽ സർവ്വീസുകൾ ആരംഭിക്കുന്നു.

മുൻപ് തിരുവനന്തപുരം മെഡിക്കൽ കോളേജിലേക്ക് പോകുന്നവർ തമ്പാനൂരിൽ നിന്നോ, കിഴക്കേക്കോട്ടയിൽ നിന്നോ ബസിറങ്ങിയാണ് പോയിക്കൊണ്ടിരുന്നത്. അത് ഒഴിവാക്കാനാണ് ജില്ലയിലെ വിവിധ ഭാഗങ്ങളിൽ നിന്നും കുളത്തൂപ്പുഴയിൽ നിന്നും വരെ ഇനി മുതൽ മെഡിക്കൽ കോളേജിലേക്ക് നേരിട്ടു സർവ്വീസ് ആരംഭിക്കുന്നത്.

സർവ്വീസ് നടത്തുന്ന റൂട്ടുകൾ…

1. നെടുമങ്ങാട് – വേങ്കോട് – വട്ടപ്പാറ- മെഡി: കോളേജ് – കണ്ണമ്മൂല – കിഴക്കേകോട്ട

2. വിതുര -നെടുമങ്ങാട് -പേരൂർക്കട – പട്ടം -മെഡി: കോളേജ്

3. നെടുമങ്ങാട്-പേരൂർക്കട-പട്ടം-മെഡി: കോളേജ്-കണ്ണമ്മൂല- തിരുവനന്തപുരം

4. കുളത്തൂപ്പുഴ-നെടുമങ്ങാട് -പേരൂർക്കട – പട്ടം -മെഡി: കോളേജ്.

5. കുളത്തൂപ്പുഴ-മടത്തറ-ചിതറ – കടയ്ക്കൽ – നിലമേൽ- കിളിമാനൂർ- വെമ്പായം- കേശവദാസപുരം- മെഡിക്കൽ കോളേജ്- തിരുവനന്തപുരം.

6. പാലോട് – കല്ലറ-കാരേറ്റ് – വെമ്പായം – മെഡി: കോളേജ്- തിരുവനന്തപുരം.

7. ആര്യനാട്- വെള്ളനാട് -പേയാട് – പൂജപ്പുര – ബേക്കറി -പാളയം- പട്ടം-മെഡി: കോളേജ്

8. വെള്ളനാട്- അരുവിക്കര- വട്ടിയൂർകാവ് – വെള്ളയമ്പലം – പട്ടം-മെഡി: കോളേജ്

9. വെള്ളറട – ചെമ്പൂര്- കാട്ടാക്കട -ബേക്കറി -പാളയം -പട്ടം -മെഡി: കോളേജ്

10. കാട്ടാക്കട – പോങ്ങമ്മൂട് – ഊരൂട്ടമ്പലം – പ്രാവച്ചമ്പലം – തിരുവനന്തപുരം -കണ്ണമ്മൂല- മെഡി: കോളേജ്.

11. വെള്ളറട – ധനുവച്ചപുരം – നെയ്യാറ്റിൻകര -തിരുവനന്തപുരം -കണ്ണമ്മൂല- മെഡി: കോളേജ്.

12. പാറശ്ശാല-ഊരമ്പ് – പൂവ്വാർ – വിഴിഞ്ഞം – കിഴക്കേകോട്ട -കണ്ണമ്മൂല- മെഡി: കോളേജ്.

13. പൂവ്വാർ – വിഴിഞ്ഞം – കിഴക്കേകോട്ട- പട്ടം -മെഡി: കോളേജ്.

14. പൂവ്വാർ – കാഞ്ഞിരംകുളം – ബാലരാമപുരം -തിരുവനന്തപുരം-പട്ടം -മെഡി: കോളേജ്.

15. വിഴിഞ്ഞം – പള്ളിച്ചൽ -തിരുവനന്തപുരം-പട്ടം -മെഡി: കോളേജ്

16. നെയ്യാറ്റിൻകര – ബാലരാമപുരം-തിരുവനന്തപുരം -പട്ടം -മെഡി: കോളേജ്.

17. കിളിമാനൂർ – കാരേറ്റ് – വെഞ്ഞാറമ്മൂട് – വെമ്പായം – കേശവദാസപുരം – കിഴക്കേകോട്ട.

18. വെഞ്ഞാറമ്മൂട് -പോത്തൻകോട്-ചെമ്പഴന്തി – ശ്രീകാര്യം -മെഡി:കോളേജ്-കണ്ണമ്മൂല-കിഴക്കേകോട്ട.

19. ആറ്റിങ്ങൽ – ചിറയിൻകീഴ് – മുരുക്കുംപുഴ – കണിയാപുരം- കാര്യവട്ടം -മെഡി:കോളേജ് -പട്ടം -തിരുവനന്തപുരം.

20. കണിയാപുരം – പെരുമാതുറ പുത്തൻതോപ്പ് – ആൾസെയിന്‍റ്സ്  കോളേജ്-പള്ളിമുക്ക്-കണ്ണമ്മൂല-മെഡി:കോളേജ്.

21. ആറ്റിങ്ങൽ- കഴക്കൂട്ടം – ബൈപ്പാസ് – കിംസ്സ് – ആനയറ -പേട്ട – ജനറൽ ഹോസ്പിറ്റൽ – കിഴക്കേകോട്ട.