ന്യൂഡല്‍ഹി: വാട്​സ്​ആപ്പിന്‍റെ വിവാദമായ പുതിയ സ്വകാര്യത നയം പൂര്‍ണമായും പിന്‍വലിക്കണമെന്ന്​ കേന്ദ്ര ഐ.ടി മന്ത്രാലയം ആവശ്യപ്പെട്ടു. വാട്​സ്​ആപ്​ കൊണ്ടുവന്ന മാറ്റങ്ങള്‍ തികച്ചും അധാര്‍മികവും അംഗീകരിക്കാനാവാത്തുമാണെന്ന്​ വാട്​സ്​ആപ്​ സി.ഇ.ഒ വില്‍ കാത്കാര്‍ട്ടിന് അയച്ച കത്തില്‍ കേന്ദ്ര ഐ.ടി മന്ത്രാലയം വ്യക്തമാക്കി.

വാട്​സ്​ആപ്പിന്‍റെ ഉടമസ്​ഥതയിലുള്ള ഫേസ്​ബുക്കുമായി ഉപയോക്​താക്കളുടെ വിവരങ്ങള്‍ കൈമാറുന്നത്​ ഗുരുതരമായ സുരക്ഷ പ്രശ്​നമാണെന്ന്​ കേന്ദ്രം അയച്ച കത്തില്‍ പറയുന്നു. പുതിയ നയം അനുസരിച്ചില്ലെങ്കില്‍ ഇനി ഉപയോക്​താക്കളായി തുടരാനാവില്ലെന്ന നയം ഇന്ത്യന്‍ പൗരന്മാരുടെ തെര​ഞ്ഞെടുക്കാനുള്ള അവകാശത്തില്‍ കൈവെക്കലാണെന്നും പുതിയ നയം പിന്‍വലിച്ച്‌​ വിവര സ്വകാര്യതയും സുരക്ഷയും ഉറപ്പുവരുത്തണമെന്നും കത്തില്‍ കേന്ദ്രം പറയുന്നു.