പത്തനംതിട്ട: ആംബുലൻസിൽ കോവിഡ് രോഗിയായ 19 വയസ്സുള്ള പെൺകുട്ടിയെ പീഡിപ്പിച്ച കേസിലെ പ്രതി നൗഫലിന്റെ ജാമ്യാപേക്ഷ കോടതി തള്ളി. പത്തനംതിട്ട പ്രിൻസിപ്പൽ സെഷൻസ് കോടതിയാണ് ജാമ്യാപേക്ഷതള്ളിയത്. പ്രതി യാതൊരു ദയയും അർഹിക്കുന്നില്ലെന്ന് കോടതി നിരീക്ഷിച്ചു.

ജാമ്യാപേക്ഷ തള്ളുന്നതിന് പബ്ലിക് പ്രോസിക്യൂട്ടർ നിരത്തിയ തർക്കങ്ങൾ മുഖവിലയ്ക്കെടുത്താണ് കോടതി ഉത്തരവ് പുറപ്പെടുവിച്ചത്. പ്രതിയുടെ പ്രവ‌ൃത്തി മൂലം പെൺകുട്ടിക്ക് കടുത്ത മാനസികാഘാതം ഏറ്റെന്ന് കോടതി നിരീക്ഷിച്ചു. വിവാഹിതനായ പ്രതി കരുതിക്കൂട്ടിയാണ് കൃത്യം നടത്തിയതെന്ന് പബ്ലിക് പ്രോസിക്യൂട്ടർ വാദിച്ചു. ‌‌

ആറന്മുളയ്ക്കടുത്ത് നാല്‍ക്കാലിക്കല്‍ പാലത്തിന് സമീപം സെപ്റ്റംബര്‍ 5നു രാത്രിയാണ് മനസാക്ഷിയെ ഞെട്ടിച്ച പീഡനം നടന്നത്. വധശ്രമക്കേസിൽ ഉൾപ്പെടെ പ്രതിയായ നൗഫലിനെ അന്നുരാത്രി തന്നെ പൊലീസ് പിടികൂടിയിരുന്നു. റെക്കോർഡ് വേഗത്തില്‍ അന്വേഷണം പൂര്‍ത്തികരിച്ച പൊലീസ് 47ാം ദിവസം കോടതിയില്‍ കുറ്റപത്രം നല്‍കി.