കാലത്തിന്റെ കരങ്ങൾക്ക് മങ്ങലേല്പിക്കാൻ കഴിയാത്ത ദൃശ്യ കലാവിസ്മയമായിരുന്നു '​അങ്ങാടി'​ എന്ന സിനിമ. നാലു പതിറ്റാണ്ടുകൾക്ക് മുമ്പ് കാലയവനികയ്ക്കുള്ളിൽ മറഞ്ഞ ജയൻ എന്ന അതുല്യ പ്രതിഭയുടെ അഭിനയപാടവത്തിന്റെ സാക്ഷ്യപത്രം.​
ഐ. വി. ശശി എന്ന സംവിധായകൻ്റെ സൃഷ്ടിയിൽ ദൃശ്യ വിസ്മയമായി ജന്മം കൊണ്ട, കൈയ്യടിച്ച് കേരളീയർ നെഞ്ചിലേറ്റിയ ജനപ്രിയ സിനിമ. ഗൃഹലക്ഷ്മി പ്രൊഡക്ഷൻസിന്റെ ബാനറിൽ പി വി ഗംഗാധരൻ നിർമ്മിച്ച 'അങ്ങാടി' ,​ നവംബർ 16 മുതൽ​ 'എസ് ക്യുബ് ഫിലിംസ്'​ യൂട്യൂബ് ചാനലിലൂടെ പ്രേക്ഷകർക്ക് മുന്നിൽ​ പുനഃരാവിഷ്ക്കരിക്കുന്നു.​ റിലീസിന് മുന്നോടിയായി​ പുറത്തിറക്കിയ​ ട്രെയിലറിന് വലിയ സ്വീകരണമാണ് ലഭിച്ചത് എന്നത് ശ്രദ്ധേയമാണ്. പഴയ മലയാള പടത്തിന് ആദ്യമായി ഒരു മൂവി ട്രെയിലർ അവതരിപ്പിക്കുന്നത് എന്ന സവിശഷതയും 'അങ്ങാടി '​ സ്വന്തമാക്കുന്നു.​