മുംബൈ: ബംഗളൂരു ലഹരിമരുന്ന് കേസുമായി ബന്ധപ്പെട്ട് ബോളിവുഡ് നടന്‍ വിവേക് ഒബ്‌റോയിയുടെ വീട്ടില്‍ ബംഗളൂരു പൊലീസ് റെയ്ഡ് നടത്തി. സഹോദരന്‍ ആദിത്യ ആല്‍വ ഉള്‍പ്പെട്ട കേസുമായി ബന്ധപ്പെട്ടാണ് റെയ്ഡ്. ഒളിവില്‍ പോയ ആദിത്യ ആല്‍വയ്ക്ക് വേണ്ടി തിരച്ചില്‍ നടത്തുന്നതിനിടെ ആല്‍വ മുംബൈയിലെ വിവേക് ഒബ്‌റോയിയുടെ വീട്ടിലുണ്ടെന്ന വിവരത്തിന്‍റെ അടിസ്ഥാനത്തിലാണ് റെയ്ഡ് നടത്തിയതെന്ന് ബംഗളൂരു പൊലീസ് പറയുന്നു.

കര്‍ണാടക മുന്‍ മന്ത്രി ജീവരാജ് ആല്‍വയുടെ മകനായ ആദിത്യ ആല്‍വ വിവേകിന്റെ ഭാര്യാസഹോദരനാണ്. ഇന്നലെ ഉച്ചയ്ക്ക് ഒരു മണിയോടെയായിരുന്നു പരിശോധന. കോടതിയില്‍ നിന്ന് സര്‍ച്ച്‌ വാറണ്ട് വാങ്ങിയ ശേഷമാണ് ക്രൈംബ്രാഞ്ച് സംഘം റെയ്ഡ് നടത്തിയത്. ബംഗളൂരുവിലെ ആദിത്യ ആല്‍വയുടെ വീട്ടിലും റെയ്ഡ് നടത്തിയിട്ടുണ്ട്.

കര്‍ണാടക മുന്‍ മന്ത്രി ജീവരാജ് ആല്‍വയുടെ മകനാണ് ആദിത്യ ആല്‍വ. കന്നഡ സിനിമ ഇന്‍ഡസ്ട്രിയിലെ അഭിനേതാക്കള്‍ക്കും ഗായകര്‍ക്കും മറ്റും ലഹരിമരുന്ന് വിതരണം ചെയ്തതില്‍ ആദിത്യ ആല്‍വയ്ക്ക് പങ്കുണ്ടെന്നാണ് ആരോപണം.

ബംഗളൂരു ലഹരിമരുന്ന് കേസില്‍ സമാന്തരമായി നാര്‍ക്കോട്ടിക്‌സ് കണ്‍ട്രോള്‍ ബ്യൂറോയുടെ അന്വേഷണം നടന്നുവരുകയാണ്. നടിമാരായ രാഗിണി ദ്വിവേദി, സഞ്ജന ഗാര്‍ലാനി എന്നിവരെ ലഹരിമരുന്ന് കേസില്‍ അറസ്റ്റ് ചെയ്തിരുന്നു.