തിരുവനന്തപുരം: സംസ്​ഥാനത്ത്​ കോവിഡ്​ അനിയന്ത്രിതമായ സാഹചര്യത്തില്‍ ആരോഗ്യ അടിയന്തരാവസ്​ഥ പ്രഖ്യാപിക്കണമെന്ന്​ ഇന്ത്യന്‍ മെഡിക്കല്‍ അസോസിയേഷന്‍ (ഐ.എം.എ). ഈ ആവശ്യം ഉന്നയിച്ച്‌​​ ഐ.എം.എ മുഖ്യമന്ത്രിക്ക്​ കത്തുനല്‍കും.

കഴിഞ്ഞ ആഴ്​ചകളില്‍ സംസ്​ഥാനത്ത്​ കോവിഡ്​ ബാധിതരുടെ എണ്ണം കുത്തനെ ഉയര്‍ന്നിരുന്നു. പ്രതിദിനം റിപ്പോര്‍ട്ട്​ ചെയ്യുന്ന കേസുകളുടെ എണ്ണം 7,000-ത്തിനും മുകളില്‍ എത്തി. രോഗവ്യാപനം തടയുന്നതിന്​ ശക്തമായ നടപടികള്‍ ആവശ്യമായിവരും. ഈ സാഹചര്യത്തിലാണ്​ ആരോഗ്യ അടിയന്തരാവസ്​ഥ പ്രഖ്യാപിക്കണമെന്ന ആവശ്യം ഐ.എം.എ ഉന്നയിക്കുന്നത്​.

'രോഗവ്യാപനത്തിന്‍റെ ഗുരുതര സ്​ഥിതി ജനങ്ങളെ ബോധ്യപ്പെടുത്തണം. രോഗവ്യാപനം തടയാന്‍ കര്‍ശന നടപടി സ്വീകരിക്കുകയും കോവിഡ്​ മാനദണ്ഡങ്ങള്‍ കര്‍ശനമായി നടപ്പാക്കുകയും വേണം. സാധാരണക്കാരിലും ആരോഗ്യ പ്രവര്‍ത്തകരിലും രോഗവ്യാപനം രൂക്ഷമാകുന്ന സാഹചര്യത്തില്‍, വരും ദിവസങ്ങളില്‍ ഗുരുതര പ്രത്യാഘാതങ്ങളുണ്ടായേക്കാം. ആശുപത്രികള്‍ നിറഞ്ഞതോടെ ഗുരുതര സാഹചര്യം നേരിടേണ്ടിവരും. സംസ്​ഥാനത്തെ ജനസംഖ്യ കണക്കാക്കുമ്പോള്‍ സംസ്​ഥാനത്ത്​ കോവിഡ്​ ഗുരുതര പ്രതിസന്ധി സൃഷ്​ടിച്ചേക്കാം. ആശുപത്രികള്‍ ഏറെക്കുറെ നിറഞ്ഞു. ആരോഗ്യ പ്രവര്‍ത്തകരുടെ കാര്യവും പരിഗണിക്കണം. അതിനാല്‍ രോഗവ്യാപനം കുറയ്ക്കാന്‍ കര്‍ശന നടപടി സ്വീകരിക്ക​ണം.'- ഐ.എം.എ ചൂണ്ടിക്കാട്ടുന്നു.