ന്യൂഡല്‍ഹി: രാജ്യസഭ നടപടികള്‍ ബഹിഷ്​കരിച്ച പ്രതിപക്ഷപ്പാര്‍ട്ടികള്‍ പ്ലക്കാര്‍ഡുകളുമേന്തി പാര്‍ലമെന്‍റ്​ മന്ദിരത്തിന്​​ മുമ്പില്‍ പ്രതിഷേധിച്ചു. 'കര്‍ഷകര്‍, ​തൊഴിലാളികള്‍, ജനാധിപത്യം എന്നിവയെ സംരക്ഷിക്കൂ' എന്ന മുദ്രാവാക്യവുമായാണ്​ പ്രതിപക്ഷം പ്രതിഷേധിച്ചത്​.

കോണ്‍ഗ്രസ്​ നേതാവ്​ ഗുലാം നബി ആസാദ്​, തൃണമൂല്‍ കോണ്‍ഗ്രസ്​ നേതാവ്​ ഡെറിക്​ ഒബ്രിയന്‍, എന്‍.സി.പിയുടെ പ്രഫുല്‍ പ​ട്ടേല്‍, സമാജ്​വാദി പാര്‍ട്ടി എം.പി ജയ ബച്ചന്‍, കേരളത്തില്‍ നിന്നുള്ള രാജ്യസഭ എം.പി-മാരായ ​കെ.കെ രാജേഷ്​, ജോസ്​ കെ. മാണി എന്നിവരടക്കമുള്ളവരും സമരത്തില്‍ പ​ങ്കെടുത്തു.

കാര്‍ഷിക ബില്ലുകള്‍ അടക്കമുള്ള വിഷയങ്ങളിലെ കേന്ദ്ര സര്‍ക്കാര്‍ നിലപാടില്‍ പ്രതിഷേധിച്ച്‌ പാര്‍ലമെന്‍റിന്‍റെ ഇരുസഭകളും ബഹിഷ്കരിക്കാന്‍ കോണ്‍ഗ്രസ് തീരുമാനിച്ചിരുന്നു. എട്ട്​ എം.പിമാരെ രാജ്യസഭയില്‍ സസ്​പെന്‍ഡ്​​ ചെയ്​ത നടപടി ഇന്നലെ പ്രതിപക്ഷ പാര്‍ട്ടികളുടെ സഭാ ബഹിഷ്​കരണത്തിലേക്ക്​​ എത്തിച്ചിരുന്നു​. ഇതിന് പിന്നാലെയാണ് ഇരുസഭകളും ബഹിഷ്കരിക്കാനുള്ള പുതിയ തീരുമാനം.

കര്‍ഷക ബില്ലിന് പിന്നാലെ ഇന്നലെ വ്യ​വ​സാ​യ​ബ​ന്ധ ച​ട്ടം, സാ​മൂ​ഹി​ക സു​ര​ക്ഷാ ച​ട്ടം, തൊ​ഴി​ലി​ട സു​ര​ക്ഷാ ച​ട്ടം എ​ന്നീ തൊ​ഴി​ല്‍ സം​ഹി​ത​ക​ളും​ പ്ര​തി​പ​ക്ഷത്തിന്‍റെ അസാന്നിധ്യത്തില്‍ പാ​സാ​ക്കിയിരുന്നു. ​ 

'നാടിനെ സംരക്ഷിക്കാന്‍ രാജ്യത്തെ പ്രധാന പ്രതിപക്ഷ കക്ഷികളെല്ലാം ഒത്തുചേര്‍ന്നിരിക്കുന്നു. കര്‍ഷകരെയും തൊഴിലാളികളെയും സാധാരണക്കാരെയും മറന്നുള്ള ഭരണത്തിനെതിരെ, ജനാധിപത്യ വ്യവസ്ഥയെയും പാര്‍ലിമെന്‍റിനെയും അട്ടിമറിക്കാനുള്ള നീക്കത്തിനെതിരെ ഒറ്റക്കെട്ടായി പോരാടാന്‍ രാജ്യം ഒന്നിക്കുകയാണ്' - എളമരം കരീം എം.പി പ്രതികരിച്ചു.