ലോസ്‌ആഞ്ചലസ്: മികച്ച ചിത്രത്തിനുള്ള ഓസ്കാര്‍ പുരസ്കാരം നേടിയ 'ചാരിയറ്റ്സ് ഒഫ് ഫയര്‍' എന്ന ചിത്രത്തിലൂടെ പ്രസിദ്ധനായ നടന്‍ ബെന്‍ ക്രോസ് (72) അന്തരിച്ചു. ഓസ്ട്രിയയിലെ വിയന്നയില്‍ വച്ചായിരുന്നു അന്ത്യം. ഏറെനാളായി രോഗബാധിതനായിരുന്നു. 1981-ല്‍ പുറത്തിറങ്ങിയ ചാരിയറ്റ്സ് ഒഫ് ഫയറില്‍ ഹരോള്‍ഡ് എബ്രഹാം എന്ന ജൂത ഒളിമ്പിക് ഓട്ടക്കാരന്റെ വേഷമാണ് ക്രോസിന്റെ കരിയറിലെ വഴിത്തിരിവായത്. ടി.വി പരമ്പരകളിലും സജീവമായിരുന്ന ക്രോസ് വില്ലന്‍ വേഷങ്ങളും അവതരിപ്പിച്ചിട്ടുണ്ട്.

1995-ല്‍ പുറത്തിറങ്ങിയ 'ഫസ്റ്റ് നൈറ്റ് (First Knite)' എന്ന ചിത്രത്തില്‍ ഷോണ്‍ കോണറി, റിച്ചാര്‍ഡ് ഗിയര്‍ എന്നിവര്‍ക്കെതിരെ വില്ലന്‍ വേഷത്തിലാണ് ക്രോസ് എത്തിയത്. 1947-ല്‍ ലണ്ടനില്‍ ജനിച്ച ക്രോസ് നാടകങ്ങളിലൂടെയാണ് സിനിമാലോകത്തേക്കെത്തിയത്. രണ്ടാം ലോകമഹായുദ്ധത്തെ ആസ്പദമാക്കിയുള്ള 'എ ബ്രിഡ്ജ് ടൂ ഫാര്‍' എന്ന ചിത്രത്തിലൂടെ 1977-ല്‍ ആയിരുന്നു അരങ്ങേറ്റം. ഐ ഒഫ് ദ വിന്‍ഡോ, ഹെല്‍ഫയര്‍, എക്സോര്‍സി‌സ്‌റ്റ്; ദ ബിഗിന്നിംഗ്, സ്‌റ്റാര്‍ ട്രെക് തുടങ്ങിയവയാണ് ക്രോസിന്റെ മറ്റ് പ്രധാന ചിത്രങ്ങള്‍. ക്രോസ് അവസാനം അഭിനയിച്ച ദ ഡെവിള്‍സ് ലൈറ്റ്, ലാസ്‌റ്റ് ലെറ്റര്‍ ഫ്രം യുവര്‍ ലവര്‍ എന്നീ ചിത്രങ്ങള്‍ അടുത്ത വര്‍ഷം റിലീസ് ചെയ്യും.