വിശാലിന്റെ പുതിയ​ സിനിമയായ 'ചക്ര'യുടെ​ മലയാളം ട്രെയിലർ സൂപ്പർ സ്റ്റാർ മോഹൻ ലാൽ പുറത്തിറക്കി. ത്രസിപ്പിക്കുന്ന ഹൈ വോൾട്ടേജ് ആക്ഷൻ ചിത്രമാണിതെന്ന് ട്രെയിലർ വ്യക്തമാക്കുന്നു. സൈബർ ക്രൈമിന്റെ പാശ്ചാത്തലത്തിലുള്ള ഒരു ആക്ഷൻ ത്രില്ലർ സിനിമയാണിതത്രെ. ഒപ്പം ഗൗരവമേറിയ ഒരു സാമൂഹിക പ്രശ്നത്തിലേക്കും​ ചിത്രം വിരൽ ചൂണ്ടുന്നു. തമിഴ്, മലയാളം, തെലുങ്ക്, കന്നഡ എന്നീ ഭാഷളിലായിട്ടാണ് 'ചക്ര' പ്രദർശനത്തിനെത്തുക. മറ്റു ഭാഷകളിൽ​ 'ചക്ര'യുടെ ട്രെയിലറുകൾ തമിഴിൽ കാർത്തി, ആര്യ, തെലുങ്കിൽ റാണാ ദുഗ്ഗുബട്ടി, കന്നഡയിൽ യഷ് എന്നിവരാണ് തങ്ങളുടെ ട്വിറ്റർ​ പേജുകളിലൂടെ റിലീസ് ചെയ്തത്.

വിശാൽ, തന്റെ വിശാൽ ഫിലിം ഫാക്ടറിയുടെ ബാനറിൽ നിർമ്മിക്കുന്ന 'ചക്ര'യുടെ സംവിധായകൻ നവാഗതനായ എം.എസ്. ആനന്ദാണ്. ഓൺലൈൻ ബിസിനസ് രംഗത്തെ കാപട്യങ്ങളുടെയും, ചതികളുടേയും പശ്ചാത്തലത്തിലുള്ള പ്രമേയമാണ്​ ​ 'ചക്ര' യുടേത്. ഒരു മിലിട്ടറി ഓഫീസർ നായക കഥാപാത്രത്തെയാണ്​ വിശാൽ അവതരിപ്പിക്കുന്നത്. ശ്രദ്ധാ ശ്രീനാഥ് പോലീസ് ഓഫീസറായി നായികാ കഥാപാത്രത്തെ അവതരിപ്പിക്കുന്നു. റെജിനാ കസാൻഡ്രെ മർമ്മ പ്രധാനമായ കഥാപാത്രത്തെ അവതരിപ്പിക്കുന്നു. സൃഷ്ടി ഡാങ്കെ, കെ.ആർ. വിജയ, മനോബാല, റോബോ ഷങ്കർ, വിജയ് ബാബു എന്നിവരാണ് മറ്റു​ അഭിനേതാക്കൾ. യുവൻ ഷങ്കർ രാജയാണ് സംഗീത സംവിധായകൻ. ബാലസുബ്രഹ്മണ്യമാണ് ക്യാമറ കൈകാര്യം ചെയ്യുന്നത്.