തിരുവനന്തപുരം: സംസ്​ഥാനത്ത്​ അന്തർ ജില്ലാ കെ.എസ്​.ആർ.ടി.സി ബസ്​ സർവിസ്​ ബുധനാഴ്​ച ആരംഭിക്കും. ചൊവ്വാഴ്​ച സർവിസ്​ ആരംഭിക്കാനിരുന്നെങ്കിലും ക്രമീകരണങ്ങൾ പൂർത്തിയാകാത്തതിനെ തുടർന്നാണ്​ തീരുമാനം.

തൊട്ടടുത്ത ജില്ലകളിലേക്ക്​ മാത്രമായിരിക്കും സർവിസ്​. ദൂരജില്ലകളിലേക്ക്​ സർവിസുകൾ ഉണ്ടാകില്ല. അതേസമയം 50 ശതമാനം ബസ്​ ചാർജ്​ കൂട്ടിയത്​ റദ്ദാക്കിയിരിക്കുന്നു. പഴയ നിരക്കിലായിരിക്കും ബസ്​ചാർജ്​ ഈടാക്കുക. എല്ലാ സീറ്റുകളിലും യാത്രക്കാർക്ക്​ ഇരുന്ന്​ യാത്ര ചെയ്യാൻ അനുമതി നൽകിയതോടെയാണ്​ നിരക്ക്​ വർധന പിൻവലിച്ചത്​.

ജൂൺ എട്ടിന്​ ശേഷം മാത്രമേ ബസ്​ സർവിസ്​ ആരംഭിക്കുവെന്നായിരുന്നു കെ.എസ്​.ആർ.ടി.സി ​നേരത്തേ അറിയിച്ചിരുന്നത്​. എന്നാൽ തിങ്കളാഴ്​ച നടത്തിയ മുഖ്യമന്ത്രിയുടെ വാർത്തസമ്മേളത്തിൽ എത്രയും വേഗം അന്തർ ജില്ല ബസ്​ സർവിസ്​ ആരംഭിക്കുമെന്ന്​ പ്രഖ്യാപിക്കുകയായിരുന്നു. കുറഞ്ഞ സമയത്തിനുള്ളിൽ ജീവനക്കാരെയും ബസുകളും​ ക്രമീകരിക്കാൻ കഴിയാത്തതാണ് ചൊവ്വാഴ്​ച സർവിസ്​ ആരംഭിക്കാത്തതിന്‍റെ​ കാരണം. ബുധനാഴ്​ച രാവിലെ മുതൽ സർവിസ്​ ആരംഭിക്കുമെന്ന്​ കെ.എസ്​.ആർ.ടി.സി അധികൃതർ അറിയിച്ചു.

ജില്ലകൾക്കുള്ളിൽ സർവിസ്​ നടത്തുന്നതിനുള്ള ക്രമീകരണങ്ങൾ മാത്രമാണ്​ നേര​ത്തെ പൂർത്തിയാക്കിയിരുന്നത്​. ഇന്ന്​ ഉച്ചയോടെ നടക്കുന്ന ഉന്നത ഉദ്യോഗസ്​ഥരുടെ യോഗത്തിലായിരിക്കും ഏതെല്ലാം ബസുകൾ ഏതെല്ലാം ജില്ലയിൽ സർവിസ്​ നടത്തണമെന്ന തീരുമാനമുണ്ടാകുക.