ന്യൂഡല്‍ഹി: ഡല്‍ഹി കലാപത്തില്‍ മരിച്ചവരുടെ കുടുംബങ്ങള്‍ക്ക്​ ഡല്‍ഹി സര്‍ക്കാര്‍ പത്ത്​ ലക്ഷം വീതം നഷ്​ടപരിഹാരം നല്‍കുമെന്ന്​ മുഖ്യമന്ത്രി അരവിന്ദ്​ കെജ്​രിവാള്‍. മറ്റു നാശനഷ്​ടങ്ങള്‍ സംഭവിച്ചവര്‍ക്ക്​ സര്‍ക്കാര്‍ നല്‍കുന്ന നഷ്​ട പരിഹാരങ്ങളും അദ്ദേഹം വാര്‍ത്ത സമ്മേളനത്തില്‍ പ്രഖ്യാപിച്ചു. കലാപത്തില്‍ പരിക്ക്​ പറ്റിയവര്‍ക്ക്​ സ്വകാര്യ ആശുപത്രികളിലടക്കം സൗജന്യ ചികിത്സ നല്‍കും. കലാപത്തില്‍ അംഗവൈകല്യമടക്കം സംഭവിച്ചവര്‍ക്ക്​ അഞ്ച്​ ലക്ഷം വീതവും വലിയ പരിക്കുകളുള്ളവര്‍ക്ക്​ രണ്ട്​ ലക്ഷം വീതവും പരിക്കേറ്റ മറ്റുള്ളവര്‍ക്ക്​ 20,000 രൂപ വീതവും നഷ്​ട പരിഹാരമായി നല്‍കും.

കലാപത്തില്‍ പങ്കുള്ളവര്‍ക്കെതിരെ അവരുടെ പാര്‍ട്ടി​യോ മറ്റു പരിഗണനകളോ നോക്കാതെ നടപടിയെടുക്കുമെന്നും അദ്ദേഹം പറഞ്ഞു. സമാധാനം നിലനിര്‍ത്തുന്നതിലും കലാപാന്തരീക്ഷം നിയന്ത്രിക്കുന്നതിലും ആപ്​ സര്‍ക്കാറിനെതിരെ കോണ്‍ഗ്രസ്​ വിമര്‍ശം ഉന്നയിക്കുന്നതിനിടെയിലാണ്​ മുഖ്യമന്ത്രിയുടെ വാര്‍ത്താ സമ്മേളനം. ഉപമുഖ്യമന്ത്രി മനീഷ്​ സിസോദിയയും അദ്ദേഹത്തോടൊപ്പമുണ്ടായിരുന്നു.

'കലാപം നടത്തിയത് എഎപിക്കാരനായാലും ബിജെപിക്കാരനായാലും കോണ്‍ഗ്രസ്സുകാരനായാലും അവരെ വെറുതെ വിടില്ല'-മാധ്യമപ്രവര്‍ത്തകരുടെ ഒരു ചോദ്യത്തിന് മറുപടിയായി അദ്ദേഹം പറഞ്ഞു.

തീ വെച്ച്‌​ നശിപ്പിച്ച വ്യാപാര സ്​ഥാപനങ്ങള്‍ ഇന്‍ഷുര്‍ സുരക്ഷ ഉള്ളവയല്ലെങ്കില്‍ അഞ്ച്​ ലക്ഷം വീതം ഡല്‍ഹി സര്‍ക്കാര്‍ നല്‍കും. വീടുകള്‍ അഗ്​നിക്കിരയായവര്‍ക്ക്​ അഞ്ച്​ ലക്ഷം വീതം നല്‍കും. വാടക വീടുകളാണെങ്കില്‍ വീട്ടുടമസ്​ഥന്​ നാല്​ ലക്ഷവും താമസക്കാര്‍ക്ക്​ ഒരു ലക്ഷവുമാണ്​ നല്‍കുക. മൃഗങ്ങള്‍ നഷ്​ടപ്പെട്ടവര്‍ക്ക്​ 5,000 രൂപ വീതവും റിക്ഷകള്‍ നഷ്​ടപ്പെട്ടവര്‍ക്ക്​ 25,000 രൂപ വീതവും ഇ-റിക്ഷകള്‍ നഷ്​ടപ്പെട്ടവര്‍ക്ക്​ 50,000 രൂപ വീതവും ഡല്‍ഹി സര്‍ക്കാര്‍ നല്‍കുമെന്ന്​ മുഖ്യമന്ത്രി അരവിന്ദ്​ കെജ്​രിവാള്‍ പറഞ്ഞു.