ബംഗളൂരു: ഭൂമി അഴിമതി കേസിൽ കർണാടകയിലെ ബിജെപി മുഖ്യമന്ത്രി ബി എസ് യെദ്യൂരപ്പയ്‌ക്കെതിരേ പരാതി നൽകിയ അലയൻസ് സർവകലാശാല മുൻ വൈസ് ചാൻസലർ ഡോ. ഡി. അയ്യപ്പ ദോറെ കൊല്ലപ്പെട്ടനിലയിൽ. ആര്‍.ടി. നഗറിലെ വീടിന് സമീപത്തെ റോഡില്‍ അജ്ഞാത സംഘത്തിന്‍റെ കുത്തേറ്റാണ് ഇദ്ദേഹം കൊല്ലപ്പെട്ടത്.

ചൊവ്വാഴ്ച രാത്രി നടക്കാനിറങ്ങിയപ്പോൾ കുത്തേറ്റെന്നാണ് പോലീസ് സംശയിക്കുന്നത്. നടക്കാൻ പോയ ശേഷം വീട്ടിൽ തിരിച്ചെത്താത്തതിനാൽ കുടുംബാംഗങ്ങൾ അന്വേഷിച്ച് ഇറങ്ങിയപ്പോഴാണ് കൊല്ലപ്പെട്ട നിലയിൽ കണ്ടെത്തിയത്. സംഭവസ്ഥലത്തെ സിസിടിവി ദൃശ്യങ്ങൾ പൊലീസ് പരിശോധിച്ചു വരികയാണ്.

ആം ആദ്മി പാർട്ടിയിൽ പ്രവർത്തിച്ചിരുന്ന ഡോ. അയ്യപ്പ 2018-ലെ നിയമസഭാ തിരഞ്ഞെടുപ്പ് സമയത്ത് 'ജനസമനയ പാർട്ടി' രൂപീകരിച്ചിരുന്നു. പൊതു രംഗത്ത് സജീവമായ അയ്യപ്പ, കലസബന്ദൂരി ജലവിതരണ പദ്ധതിക്കായി സമരവും സംഘടിപ്പിച്ചിരുന്നു.