ന്യൂഡല്‍ഹി: ‘വ്യോമസേനയ്ക്ക് സല്യൂട്ട്’... പുല്‍വാമ ഭീകരാക്രമണത്തിന് ഇന്ത്യ നല്‍കിയ തിരിച്ചടിക്ക് അഭിനന്ദനവുമായി കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി. വ്യോമസേനക്ക് സല്യൂട്ടെന്ന് അദ്ദേഹം ട്വിറ്ററില്‍ കുറിച്ചു. പുലര്‍ച്ചെ 3.30-ന് ഇന്ത്യന്‍ വ്യോമസേനയുടെ 12 മിറാഷ് 2000 യുദ്ധ വിമാനങ്ങളാണ് ആക്രമണം നടത്തിയത്. 1,000 കിലോഗ്രാം സ്‌ഫോടക വസ്തുക്കള്‍ ഭീകരകേന്ദ്രത്തിന് നേരെ വര്‍ഷിച്ചെന്നും റിപ്പോര്‍ട്ടുണ്ട്. ഫെബ്രുവരി 14-ന് പുല്‍വാമ ഭീകരാക്രമണം നടന്ന് 12 ദിവസത്തിന് ശേഷമാണ് ഇന്ത്യ തിരിച്ചടിച്ചത്.

ഭീകരസംഘടനയായ ജെയ്‌ശെ മുഹമ്മദിന്‍റെ ആസ്ഥാനം സ്ഥിതി ചെയ്യുന്ന ബലാകോട്ട്, ചകോത്തി, മുസാഫറാബാദ് എന്നിവിടങ്ങളിലാണ് ആക്രമണം നടത്തിയത്. ജെയ്‌ശെ മുഹമ്മദിന്‍റെ കണ്‍ട്രോള്‍ റൂം പൂര്‍ണമായി തകര്‍ത്തുവെന്നാണ് സേനാ വൃത്തങ്ങളെ ഉദ്ധരിച്ചുള്ള വിവരം.