തിരുവനന്തപുരം: ശബരിമലയില്‍ നടയടച്ച്‌ ശുദ്ധിക്രിയ ചെയ്തതില്‍ വീഴ്ച സംഭവിച്ചിട്ടില്ലെന്ന്​ തന്ത്രി കണ്​ഠരര്​ രാജീവര്.​ താന്‍ ചെയ്​തത്​ തന്‍റെ ഉത്തരവാദിത്വമാണെന്നും യുവതികള്‍ പ്രവേശിച്ചതിനാല്‍ ആയിരുന്നില്ല ശുദ്ധിക്രിയയെന്നും തന്ത്രി ദേവസ്വം ബോര്‍ഡിന്​ നല്‍കിയ വിശദീകരണത്തില്‍ വ്യക്തമാക്കി. ബിന്ദുവും കനക ദുര്‍ഗയും ശബരിമലയില്‍ ദര്‍ശനം നടത്തിയതിനെ തുടര്‍ന്ന്​ ശുദ്ധിക്രിയകള്‍ നടത്തിയ സംഭവത്തില്‍ തിരുവിതാംകൂര്‍ ദേവസ്വം ബോര്‍ഡ്​ നല്‍കിയ കാരണം കാണിക്കല്‍ നോട്ടീസിനുള്ള മറുപടിയായാണ്​ തന്ത്രി വിശദീകരണം നല്‍കിയത്​. ദേവസ്വം ബോര്‍ഡിന്‍റെ അനുമതി വാങ്ങാതെ തന്ത്രി നടയടച്ച്‌ ശുദ്ധിക്രിയ നടത്തിയെന്ന ആരോപണത്തെ തുടര്‍ന്നാണ്​ തന്ത്രിയോട് വിശദീകരണം തേടിയത്​.

ശബരിമല ക്ഷേത്രവുമായി ബന്ധപ്പെട്ട്​ ഉയര്‍ന്ന വിവാദങ്ങള്‍, അപകീര്‍ത്തികള്‍ എന്നിവ ക്ഷേത്ര ചൈതന്യത്തിന്​ കോട്ടം തട്ടുകയും ഭക്തര്‍, ശാന്തിമാര്‍, തന്ത്രി, മേല്‍ശാന്തി, മറ്റ്​ ജീവനക്കാര്‍ എന്നിവരുടെ യശസ്സിന്​ കുറവു വരുത്തുകയും ചെയ്​തതിനാലാണ്​ ശുദ്ധിക്രിയ ചെയ്​തത്​. മകര വിളക്കിന്​ നട തുറക്കുന്ന സമയത്ത്​ ശുദ്ധിക്രിയ ചെയ്യണ​മെന്നായിരുന്നു നിശ്ചയിച്ചിരുന്നത്​. എന്നാല്‍ നട തുറക്കുന്ന ഡിസംബര്‍ 31-ന്​ പൂജകള്‍ ഇല്ലാതിരുന്നതിനാലും അടുത്ത ദിവസം വലിയ തിരക്ക്​ അനുഭവപ്പെട്ടതിനാലും ജനുവരി രണ്ടിന്​ ചെയ്യുകയായിരുന്നുവെന്നും തന്ത്രി വിശദീകരിച്ചു.

ചൊവ്വാഴ്ച ചേരുന്ന ബോര്‍ഡ് യോഗത്തില്‍ ഇത്​ ചര്‍ച്ച ചെയ്യും. യുവതികള്‍ ക്ഷേത്ര ദര്‍ശനം നടത്തിയത്​ ആചാര ലംഘനമാണെന്ന നിഗമനത്തില്‍ ശുദ്ധിക്രിയ നടത്തി എന്ന ആരോപണം ശരിയല്ല. നിലവിലുള്ള ആഗമന ശാസ്​ത്ര വിധി പ്രകാരവും തന്ത്രശാസ്​ത്ര വിധി പ്രകാരവുമാണ്​ താന്‍ ശുദ്ധിക്രിയ നടത്തിയതെന്നും ഇക്കാര്യം ബോര്‍ഡ് അധികൃതരെ അറിയിച്ചിരുന്നെന്നും തന്ത്രി വ്യക്തമാക്കി. ഏതെങ്കിലും നിഗമനത്തിന്‍റെ അടിസ്​ഥാനത്തിലല്ല, മറിച്ച്‌​ തന്ത്രശാസ്​ത്ര വിധി പ്രകാരം ക്ഷേത്രാചാര അനുഷ്​ഠാനങ്ങള്‍ക്ക്​ കോട്ടം തട്ടു​മ്പോഴാണ്​ ശുദ്ധിക്രിയ നടത്തുന്നത്​.