തിരുവനന്തപുരം: ഇരുപത്തിമൂന്നാമത് കേരള രാജ്യാന്തര ചലച്ചിത്രമേളയിലെ പുരസ്കാരങ്ങൾ പ്രഖ്യാപിച്ചു. ഈ.മ.യൗ-ന്‍റെ സംവിധാനത്തിന് ലിജോ ജോസ് പല്ലിശ്ശേരി മികച്ച സംവിധായകനുള്ള രജത ചകോരം കരസ്ഥമാക്കി. ഈ ചിത്രത്തിന് മൂന്ന് പുരസ്കാരങ്ങളാണ് ലഭിച്ചത്. മികച്ച സംവിധാനത്തിന് പുറമേ മികച്ച ഏഷ്യൻ ചിത്രം, മികച്ച ജനപ്രിയ ചിത്രം എന്നിവയും ലഭിച്ചു. 

മോണിക്ക ലൈനാരയുടെ ചിത്രം 'ദ ഡാർക്ക് റൂം'-ന് സുവർണ ചകോരം ലഭിച്ചു. അനാമിക ഹക്സര്‍ നവാഗത സംവിധായകനുള്ള രജത ചകോരം ഏറ്റുവാങ്ങി. മികച്ച മലയാള ചിത്രമായി തിരഞ്ഞെടുക്കപ്പെട്ടത് സുഡാനി ഫ്രം നൈജീരിയ ആണ്. സൗമ്യ നാന്‍ സാഹി സ്പെഷ്യൽ ജൂറി പരാമർശം നേടി. മികച്ച ചിത്രത്തിനുള്ള പരാമർശം ദ ലെസന്‍ നേടി.

തിരുവനന്തപുരം നിശാഗന്ധിയിൽ വച്ച് നടന്ന ചടങ്ങിൽ മുഖ്യമന്ത്രി പിണറായി വിജയനിൽ നിന്നും പുരസ്കാരങ്ങൾ ഏറ്റുവാങ്ങി. മന്ത്രി ബാലൻ സംവിധായകൻ കമൽ തുടങ്ങിയവരും ചടങ്ങിൽ പങ്കെടുത്തു.