പൃഥ്വിരാജിനെ നായകനാക്കി സന്തോഷ് ശിവന്‍ ഒരുക്കിയ ചിത്രം 'ഉറുമി'യില്‍ അഭിനയിച്ച അനുഭവം പങ്കുവെച്ച് വിദ്യാബാലന്‍. ചിത്രത്തില്‍ 'ചലനം ചലനം' എന്ന ഗാനരംഗത്തിലാണ് വിദ്യ അഭിനയിച്ചത്. താരത്തിന്‍റെ ഒരേയൊരു മലയാള സിനിമയാണ് ഉറുമി. ആ ഗാനരംഗം ഷൂട്ട് ചെയ്യുമ്പോള്‍ വളരെ നെര്‍വസും ഭയചകിതയുമായിരുന്നുവെന്ന് വിദ്യ പറയുന്നു.

നൃത്തം ചെയ്യാന്‍ തന്നെ തനിക്കു ഭയമാണെന്നിരിക്കെ നൃത്തനിപുണനായ പ്രഭു ദേവയെപ്പോലെ ഒരാളുടെ മുന്നില്‍ നൃത്തം ചെയ്യാന്‍ പേടിയായിരുന്നു. എന്നും ചിത്രീകരണത്തിന്‍റെ ആദ്യാവസാനം താന്‍ കനത്ത മഴയത്തായിരുന്നു പാട്ടുരംഗം ചിത്രീകരിച്ചത്. ലൊക്കേഷന്‍ മുഴുവന്‍ ചെളിയുമായിരുന്നു. 

എന്‍റെ നൃത്ത പാടവത്തെക്കുറിച്ച്‌ എനിക്ക് തന്നെ വലിയ മതിപ്പില്ലാതെയിരിക്കുന്ന സാഹചര്യത്തില്‍ പ്രഭുദേവയുടെ മുന്നില്‍ നൃത്തം ചെയ്യേണ്ടി വന്നു. അത് മാത്രമല്ല, നൃത്തം ചെയ്യാനും ഞാന്‍ നൃത്തം ചെയ്തത് കാണാനും എനിക്ക് ഇഷ്ടമല്ല. പക്ഷേ ഇന്ന് വര്‍ഷങ്ങള്‍ക്ക് ശേഷം ഈ ഗാനം കണ്ടപ്പോള്‍ എനിക്ക് എന്നെത്തന്നെ മറ്റൊരു വീക്ഷണ കോണിലൂടെ കാണാന്‍ കഴിയുന്നുണ്ട്. 

'ഞാന്‍ നൃത്തം ചെയ്തത് മോശമല്ലല്ലോ' എന്ന തോന്നലും പുഞ്ചിരിയുമാണ് ഈ നൃത്ത രംഗം ഇപ്പോള്‍ എന്നില്‍ ഉളവാക്കുന്നത്. ഇന്നത്തെ എന്നെക്കുറിച്ച്‌ എനിക്ക് നല്ല അഭിപ്രായം ഉണ്ടാകാന്‍ അടുത്ത എട്ടു വര്‍ഷം കാത്തിരിക്കണോ എന്നാണ് ഇപ്പോള്‍ ഞാന്‍ ആലോചിക്കുന്നത്. വേണ്ട എന്നാണ് എന്‍റെ ഉത്തരവും. എന്നെ ഞാനായിത്തന്നെ സ്നേഹിക്കാന്‍, സ്വീകരിക്കാന്‍ ഞാന്‍ ഇന്ന്, ഇപ്പോള്‍, ഈ നിമിഷം തന്നെ തയ്യാറാണെന്നും വിദ്യ ഇന്‍സ്റ്റാഗ്രാമിലെ കുറിപ്പില്‍ പറയുന്നു.