തിരുവനന്തപുരം: ജില്ലാ സഹകരണ ബാങ്കുകളെ ലയിപ്പിക്കാന്‍ മന്ത്രിസഭാ തീരുമാനം. കേരള സഹകരണ ബാങ്ക് രൂപീകരിക്കുന്നതിന് സംസ്ഥാന സഹകരണ ബാങ്കിനെയും പതിനാല് ജില്ലാ സഹകരണ ബാങ്കുകളെയും ലയിപ്പിച്ച്‌ ഹ്രസ്വകാല വായ്പാ സഹകരണ സംഘങ്ങളെ ത്രിതലത്തില്‍ നിന്നും ദ്വിതലത്തിലേക്ക് മാറ്റാന്‍ മന്ത്രിസഭാ തീരുമാനം. റിസര്‍വ് ബാങ്ക് മുന്നോട്ടുവെച്ച നിബന്ധനകള്‍ക്ക് വിധേയമായാണ് ഈ മാറ്റം വരുത്തുക. കേരള സഹകരണ ബാങ്ക് രൂപീകരിക്കുന്നതിന്‍റെ ഭാഗമായാണ് ഈ നടപടി.

അതേസമയം, സംസ്ഥാനത്ത് കേരളാബാങ്ക് രൂപികരിക്കാന്‍ യുഡിഎഫിന് ഭൂരിപക്ഷമുള്ള അഞ്ച് ജില്ലാ സഹകരണ ബാങ്കുകള്‍ പ്രമേയം പാസാക്കില്ലെന്ന് യു.ഡി.എഫ് നേതൃത്വം അറിയിച്ചു. റിസര്‍വ് ബാങ്ക് വ്യവസ്ഥയനുസരിച്ച്‌ എല്ലാ ജില്ലാ ബാങ്കുകളും ജനറല്‍ ബോഡി വിളിച്ച്‌ പ്രമേയം പാസാക്കിയാലേ കേരളാ ബാങ്ക് രൂപീകരണം നടപ്പിലാവുകയുള്ളൂ.