പത്തനംതിട്ട: പത്തനംതിട്ടയില്‍ കാണാതായ കോളേജ് വിദ്യാര്‍ത്ഥിനി ജസ്‌നയ്ക്കായി അന്വേഷണ സംഘം ബംഗലൂരുവില്‍ തിരച്ചില്‍ നടത്തുന്നു. ജസ്‌നയോട് സാമ്യമുള്ള പെണ്‍കുട്ടിയെ കഴിഞ്ഞ ദിവസം ബംഗളൂരുവില്‍ മെട്രോയില്‍ കണ്ടതായി വിവരം ലഭിച്ചതിന്‍റെ അടിസ്ഥാനത്തിലാണ് തിരച്ചില്‍ നടത്തുന്നത്. കൂടുതല്‍ അന്വേഷണത്തിനും തെളിവെടുപ്പിനുമായി ജില്ലാ പൊലീസ് മേധാവിയുടെ ഷാഡോ പൊലീസ് സംഘം ബംഗളൂരുവിലെത്തുകയും ചെയ്തു.

ശനിയാഴ്ച വൈകുന്നേരം മെട്രോയില്‍ നിന്നിറങ്ങിവരുന്നതു കണ്ടതായാണ് ബംഗളൂരുവിലുള്ള ഒരാള്‍ പൊലീസിനെ വിവരം അറിയിച്ചത്. ഇതിന്‍റെ അടിസ്ഥാനത്തിലാണ് മംഗളൂരുവില്‍ അന്വേഷണത്തിലായിരുന്ന പൊലീസ് സംഘത്തെ ബംഗളൂരുവിലേക്ക് അയച്ചത്. ചുരിദാറാണ് വേഷമെന്നാണ് വിവരം. കണ്ണടയും വെച്ചിട്ടുണ്ട്. മെട്രോയ്ക്കുള്ളിലെ സിസിടിവി ദൃശ്യങ്ങള്‍ പൊലീസ് ശേഖരിക്കാനുള്ള ശ്രമത്തിലാണ്. അതു ലഭിച്ചാല്‍ കൂടുതല്‍ വ്യക്തത കൈവരുത്താനാകുമെന്നാണ് വിവരം.