കൊച്ചി: പത്തനംതിട്ടയില്‍ നിന്ന് കാണാതായ കോളേജ് വിദ്യാര്‍ത്ഥിനി ജസ്‌ന ജെയിംസിന് വേണ്ടി സാധ്യമായ എല്ലാ അന്വേഷണവും നടത്തിയെങ്കിലും ഇതുവരെ ഫലം കണ്ടില്ലെന്നും പൊലീസ് കോടതിയില്‍ വ്യക്തമാക്കി. ജസ്‌നയ്ക്ക് വേണ്ടി ലുക്കൗട്ട് നോട്ടീസ് പുറത്തിറക്കാനുള്ള നടപടി പൂര്‍ത്തിയാക്കിയെന്നും പൊലീസ് വ്യക്തമാക്കി. ജസ്‌നയെ കാണ്ടെത്താനുള്ള അന്വേഷണം സിബിഐക്ക് വിടണമെന്ന് സഹോദരന്‍റെ ഹര്‍ജിയിലാണ് അന്വേഷണ ഉദ്യാഗസ്ഥനായ തിരുവല്ല ഡിവൈഎസ്പി ആര്‍ ചന്ദ്രശേഖരപിള്ളയുടെ വിശദീകരണം.

അതേസമയം അന്വേഷണം ഊര്‍ജിതമാക്കാനുള്ള നടപടി തേടുന്നതിന് പകരം ഹേബിയസ് കോര്‍പസ് ഹര്‍ജി നല്‍കിയതെന്തിനാണെന്നും കോടതി ആരാഞ്ഞു. ജസ്‌നയെ ആരെങ്കിലും തടവില്‍ വെച്ചെന്ന ആശങ്കയില്ലാത്ത സാഹചര്യത്തില്‍ കോടതി മുഖേന ഉചിതമായ ബദല്‍ മാര്‍ഗം തേടുകയാണ് വേണ്ടിയിരുന്നതെന്നും കോടതി വ്യക്തമാക്കി. സഹോദരന്‍ നല്‍കിയ ഹേബിയസ് കോര്‍പസ് ഹര്‍ജി പരിഗണിക്കുകയായിരുന്നു കോടതി. തുടര്‍ന്ന് ഹര്‍ജി ചൊവ്വാഴ്ച വിധി പറയാനായി മാറ്റിയിരിക്കുകയാണ്.