കൊച്ചി: ജസ്‌നയുടെ തിരോധാനത്തില്‍ പൊലീസിനെതിരെ രൂക്ഷ വിമര്‍ശനമുന്നയിച്ച് ഹൈക്കോടതി. കാട്ടിലും മറ്റും അന്വേഷിച്ചു നടന്നതു കൊണ്ട് കാര്യമില്ലെന്നും അന്വേഷണം കൃത്യമായ സൂചനകളിലേക്ക് നീങ്ങണമെന്നും കോടതി പൊലീസിനോട് നിര്‍ദേശിച്ചു. അവിടെയും ഇവിടെയും വെറുതെ അന്വേഷിച്ചിട്ടു കാര്യമില്ലെന്നുമാണ് കോടതി ചൂണ്ടിക്കാട്ടിയത്.

ജസ്‌ന കേസ് സി.ബി.ഐക്ക് വിടണമെന്ന സഹോദരന്‍ ജെയ്‌സിന്‍റെ ഹര്‍ജി പരിഗണിക്കുമ്പോഴായിരുന്നു കോടതിയുടെ വിമര്‍ശനം. ജസ്‌നയെ വീട്ടില്‍ നിന്ന് തട്ടിക്കൊണ്ടു പോയതല്ലെന്ന് സര്‍ക്കാറും കോടതിയെ അറിയിച്ചു. കേസില്‍ വിശദമായ അന്വേഷണമാണ് നടക്കുന്നത്. ആദ്യം കുറച്ചു മന്ദഗതിയില്‍ ആയിരുന്ന അന്വേഷണം പിന്നീട് ശക്തമായി പുരോഗമിക്കുന്നുണ്ടെന്നാണ് സര്‍ക്കാര്‍ അഭിഭാഷകന്‍ കോടതിയെ അറിയിച്ചത്. ഇതോടൊപ്പം തന്നെ അന്വേഷണ റിപ്പോര്‍ട്ട് സര്‍ക്കാര്‍ കോടതിയില്‍ സമര്‍പ്പിക്കുകയും ചെയ്തു. കേസ് ജൂലൈ നാലിന് വീണ്ടും പരിഗണിക്കും. അതോടൊപ്പം സഹോദരന്‍റെ ഹര്‍ജിയില്‍ സി.ബി.ഐ-ക്ക് നോട്ടീസ് അയക്കാനും കോടതി തീരുമാനിച്ചിട്ടുണ്ട്.