അഞ്ചല്‍: അഞ്ചലിൽ ബസ്സും ബൈക്കും കൂട്ടിയിടിച്ചുണ്ടായ അപകടത്തിൽ യുവ അധ്യാപകന് ദാരുണാന്ത്യം. അഞ്ചൽ - ചണ്ണപ്പേട്ട പാതയിൽ പുത്തയം ഭാഗത്തു വെച്ച് ഇന്ന് രാവിലെയാണ് അപകടം നടന്നത്. ചണ്ണപ്പേട്ട മാർത്തോമ്മാ സ്കൂളിലെ കണക്ക് അധ്യാപകനായ ആയൂർ, പെരിങ്ങള്ളൂർ മുകളുവിള വീട്ടിൽ ആദർശ് തോമസ് മാത്യു (27) ആണ് മരിച്ചത്. അവിവാഹിതനാണ്. ബൈക്കും സ്വകാര്യ ബസ്സും കൂട്ടിയിടിക്കുകയായിരുന്നു. ബൈക്കിന്‍റെ പിൻഭാഗത്ത് ഇരുന്ന ആദർശിനെ ഗുരുതര പരിക്കുകളോടെ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. മൃതദേഹം പുനലൂർ താലൂക്ക് ആശുപത്രിയിൽ പോസ്റ്റ്മോർട്ടത്തിനായി സൂക്ഷിച്ചിരിക്കുകയാണ്.

രാവിലെ വീട്ടിൽ നിന്നും സ്കൂളിലേക്കു പോകും വഴിയാണ് അപകടം. കടക്കൽ - അഞ്ചൽ റൂട്ടിൽ സർവീസ് നടത്തുന്ന ടിൻറു മോൻ എന്ന ബസ്സാണ് ബൈക്കിൽ ഇടിച്ചത്. ബൈക്ക് ഓടിച്ചിരുന്ന ഡാനിയേൽ എന്ന അധ്യാപകൻ നിസ്സാര പരിക്കുകളോടെ രക്ഷപ്പെട്ടു.